Nangzükba limai aitsü mapang tongogo

Dimapur, June 19 (TYO) : Kingdom Culture Church nung senior Pastor Visasier Kevichüsa-i tang temongtak aliba anogo 40 nü asentenshi sentep sentong 17buba nung Hokolbar, June 17 nü Tsüngrem o jembiba mapang Anitet 3:7 aser Yihusua 5:11-12 nung Israel nunger küm 40 tashi arem min nung nemzür nangzükba lima atongba atishia jembi.
“Joko küm 40 abensaogo anungji joko asenok nangzükba limai aitsü mapang lir. Tsüngremi asenok ajak jaokogo. Nangzükba limai aitsü atema tanur tain ajak dak kinü tanur ama tamang aser tasü tait alitsü nüngdaker. Asenok nemzüa aliba mapang Pai asenok yariogo, ajisüaka kodang asenok nangzükba limai idir Tsüngremi asenok kinü tanur ama anepalu masütsü saka temoatsü aser sayatenya balaka nung angutsü. Na nangzükba limai aoer süra nemzüba taküm ama malitsüla,” ta pai ashi.
Asentenshi idang jembidang pai, “Ibai langaka talila meshiba mapang ka masü saka Tanela Temeshi arakzüba angutsü atema temai adoka Pa küli asütsüla (lenmang aser yimtongtem nung).
Asentenshi ya joko oset ka amaidang kümogo kechiba süra asenoki iba indang laka dang jembia arur. Asentenshiji Yisui asenok atema inyakba angateta asen taküm melenshiba mapang ka lir,” ta pai ashi.
Paisa, “Nai asentenshi matar saka asentenshi-i na atar. Oang aser asentenshiang. Tsüngremi agütsüba hadir tem amshiang,” ta shisem.
1952, 1962 aser 1976 kümtem nung asentenshi adokba bilemteta Kevichüsa-i, “Tesüiba mapangtem atalokba nungi asenok angazüktsü nüngdak. Tatalokba ajak ya pa sasa odang atalokba masü saka Tsüngremi asenok angazüktsü atema aser tanela nung tain küma alima nung kotak angutsü atema atalokdaktsüba lir,” ta ashi.
Tatemsa sentepa alirtem dang Pastor Visasier-i, “Asentenshi ya kangtepba maparen ka masü saka Yisu mesüka alitsü merangba mapa lir. Asenoki Tsüngrem dang asen nüngdak ka atema sarasademdang Pai yokadoker alir. Asenoki mabensaba atema masü saka süngsemtsü atema sarasademer. Tamanger ka ama asenoki Pa asen den adenba metettsü angazüktsüla aser timtem tushi jenti ajuruaka Pa atema bendanga agüja inyaktsüla,” ta ashi.