Nangzüktepba agi dangbo alima tatsükba akümbaren menokdangtettsü: UN

Paris, November 06 (Agencies): Alima linüktemi miim aketba carbon tango tajemba adoktsütsü tenangzükba agiba agi dangbo alima tali tatsükba akümbaren takok ngua menokdangtettsü ta United Nations (UN)-i tanü Hokolbar nü metetdaktsüogo.
Tarutsü mapang, 2030 küm tashi nung alima Celsius degree 2 den tatsükba mekümdaktsütsü alizüng ajangzüktsü nükjidong nung ayongba Climate senden Paris yimti nung amentsü asoshi hopta 3 shi anünga alidang UN-i tanü iba osangji sangoktsür lir.
“Tanü tashi nung alima linük 146 tashi carbon tango ajema adoktsütsü nangzüka lir. Parnoki nangzükba ama takok ngua inyaktetaka, ibaji alima tali tatsükba akümbaren nokdangtsü asoshi nungdakba carbon tango ajemtsütsü asemsü nung shilem 1 dang inyakteter asütsü,” ta UN Environment Programme (UNEP) nung Executive Director, Achim Steiner-i metetdaktsü.
Paisa ashiba agi, alimai alizüngji asangsang nung majangzüktetra, alima tesem balala nung ayawara aser tsüngsang mupong tesashi ajurua nüburtemi sunepa melitettsü.
Tan November ita 30 nü nungi December ita 11 nü tashi amentsü ayongba climate senden amenba jakdang UNEP-i alima linüktemi carbon tango tajemba adoktsütsü asoshi agiba tenangzükbatem bendena lir.
Intended Nationally Determined Contributions (INDCs) ta ajaba carbon tango ajemtsütsü tenangzükbarenji takok ngua agiba ajanga alimai miim aketba carbon tango ton billion 6 shi ajemtsütetsü ta UNEP-i bushiteta lir.