Nanung ayong, Mongsenyimti nung ‘Angling Festival’ tenzükogo

Mongsenyimti (Mokokchung), June 05 (TYO): World Environment Day den mapang sütepa Meyilenden Valley Fishery Welfare Society (MVFWS) den Anglers Association Mokokchung (AAM)-i senteper tanü Mokokchung district kübok Mongsenyimti nung aliba Nanung ayong awatsüng nung AMM Executive züngsem aser MO Chest & TB Hospital, Mokokchung, Dr Takosunep-i hopta ka piyong ango apuba Angling Festival tenzüktsüogo.
Nanung ayong nung tzü tepdanga yangluba awatsüng ya tasazük Sq/meter 500 shi lir, aser yangi ayong ngo tapu aika lir.
Iba awatsüng ya Mokokchung town nungi kilometer 24 shi aser National Highway 61 nungi kilometer ana ser tesadang shi lir. Iba awatsüng ya Meyilenden Valley Fishery Welfare Society (MVFWS), Mongsenyimti Village-i achaayanga repranger.
Nanung river Angling festival tenzüktsüdang Dr Takosunep-i angling festival ayangzokba atema Mongsenyimti village aser MVFWS dang pelaba metetdaktsü.
Paisa, angling ya eco-friendly saisapong ka lir aser iba ya ajaki ajungshitsüla, ta metetdaktsü.
Ayong nung ango aputsü atema bomb, mozü balala aser battery mamshitsü ajungshia pai, item ama inyakyimji ‘unsustainable’ dang masü saka mapang talangka nungbo biodiversity nunga kongshitsü, ta metetdaktsü.
Kasa sentong nung Mongsenyimti village tenüng nungi ‘Putu Menden’ lenir katia Nanung ayonglen terenlok mapatem inyaktsüba atema pelaba lemsatep.
Paisa ali kiburtem dang, kenü anogobo Nanung ayong tesem ya Nagaland nung tourist tesem ka akümtsü atema sorkar agency tem den amalitepa inyaktsü ayongzük.
Iba sentong ya MVFWS chairman, Sentitongzuk Pongen leniba nung agi aser Mongsenyimti Compound Baptist Church Pastor-i Tsüngrem temoatsü meshia sarasadema liasü.
Iba Angling festival ya hopta ka piyong akatsü, aser iba festival nung Mokokchung aser tanga district tem nungia ango aputsü jangrar aikati arua shilem agitsü imlar.