Naomi Osaka-i Australian Open koka No.1 jenjang tongtetogo

Honibarnü Melbourne, Australia nung Australian Open tetsür kija asaya final nung Czech Republic tsür Petra Kvitova akokba sülen Japan tsür Naomi Osaka takok marok amer tangokba noksa nung angur.

Melbourne, Aenjeti/January 26 (Agencies): Honübar aonung Australian Open tetsür kija final asaya nung Japan tsür Naomi Osaka-i 7-6 (2), 5-7, 6-4 agi Petra Kvitova kokogo. Iba asayamung akokba densema lai Grand Slam ana atonga kokogo.
Iba asaya akokba sülen arishi küm 21 tain Osaka ya Japan nungi asayartem rongnung No. 1 jenjang tongtetba mezüngbuba asayar kümogo.
Tanabuba set nung game 5-3 ta aliba mapang Kvitova-i serve asüdang Osaka tejakdang ser 0-40 liasü saka lai iba maongka ya magitet aser iba sülen point 27 nungi lai point 23 Kvitova nem agütsü. Iba ajanga Kvitova tashi itshi aser pai game pongu koka tanabuba set akok.
Osaka la dak temulung masüba ajanga aiben la sasa la dak asalokja liasü. Lai ball ka dena court alema züktok. Tanabuba set tembangba sülen la towel agi tekolak nembanger locker room-i ai.
Tasembuba set asaya nung Osaka asendenshir asaya aser game kaka koker aliba mapang nung Kvitova-i double-fault ka menaba ajanga Osaka nem serve break asütsü maongka agütsü, koba lai melalui agiteta liasü. Asaya nung tzünglua khen aruba ajanga asaya anena liasü. Iba sülen Osaka-i 6-4 agi takok angu.
Taoba küm US open final nung Serena Williams akokba sülen tang lai Australian Open benogo. US Open final asaya nung Williams chair umpire den mepetmesü adoka asaya tebor ajunga raksaba ama mesüi tanü asaya kanga junga tembangogo.
Williams-i 2014-15 tsüngda asayamung tongtibang ana atonga akokba sülen tang Osaka-i mezüngbuba Grand Slam ana atonga koktetogo.