Napana ayong nung Diversion Weir ka semzükogo

Pughoboto, June 04 (TYO): PMSKY 2018-19 scheme kübok Chishilimi yimdak Napana ayong nung yangluba Diversion weir ka June 4, 2019 nü Joint Director of Agriculture, Jacob Yanthan-i semzüktsüogo; iba sentong nung ADC Pughoboto, K. Mhathung Tsanglao-a densema liasü, ta ketdangsertem osang ka ajanga metetdaktsü.
Iba sentong nung tetushi tejaoker Joint Director, Jacob-i PMSKY scheme indang metetdaktsü aser iba scheme nungi anguba tajangzük tajungtiba nung amshitsü ayongzük.
ADC-i ketdangsertem aser aluyimertem nem tenüngsang agüja, maparen balala inyakba ajanga aluyimertemi timba züsenteta rongsenkettsüng jenjang aintsü, ta ashi.
Iba sentong lenir SDAO Pughoboto, E. Myanthung Patton-i, tzü mesüba scheme ya tzü rizüngtsü aser tzülu kümzüktsü atema lir, ta metetdaktsü. Paisa, aluyimertem sen aazüka taküm alitsü atema parnok nem power tillers ama machineries, kibong 80 nem poultry farming, ango chanu 900 aser hadir balala agütsüogo, ta metetdaktsü.
Diversion weir ji ajanga aluyimba tesem ka nung tzü mesüa agütsütsü, ango tzübo nung tzü aittsü aser mongpu ajak nung aluyimtsü atema tzü rizünga yutettsü.
Tajangzük angurtem tenüng nung Shikato Chishi-i jembia liasü. Sentong tetenzüklen Associate Pastor (Youth), Vikato-i sarasadem aser Hokato Chishi-i tepela anküp o jembia liasü.