NAPTC küm 50 süia arudang konang-nüngsang aika ngutetogo

October 1, 2019 nü NAPTC complex Chumukedima nung Nagaland DGP T.J Longkumer, IPS aser retired den tang teinyakdak police ketdangsertem Golden Jubilee Mural  sayaba sülen agiba noksa angur. 

Dimapur, October 1 (TYO): October 1, 2019 nü Nagaland Armed Police Training Center-i Golden Jubilee sentong ayonga agiogo.
NAP Training Center Complex nung agiba sentong nung Director General of Police, Nagaland T. J. Longkumer IPS-i tetushi süa jaoker ka ama shilem agi.
“Iba anogo ya otsüsütsü anogo ka lir aser ajak dang kanga pelar. Iba anogo asoshi Tsüngrem nem tenüngsang agütsür aser commandant NAPTC den NAPTC nung alir ajak dang pelaba shisemer,” ta T. J. Longkumer IPS-i ashi.
“1963 küm Nagaland state kümtetdang NAP-a dena kümtet aser tanü NAP aser IRB-i state dang masü saka linük nung state aika nung tenzükdar. Parnoki mapa tajung inyakba ajanga asen state nem konang nüngsang bener arutsür,” ta paisa ashi.
“Konang-nüngsang ajakji NAPTC nung tera yanga lir kechiyong 1st NAP nungi 15th IRB tashiji iba reju nung anitet aser tesayuba agütsü. Nagaland Police tenüng nung ni NAPTC Commandant, officers aser staff nem tenüngsang agütsür” ta T. J. Longkumer-i metetdaktsü.
Tanü Nagaland DGP-isa Jubilee Memento aser Souvenir sayatsü.
Taoba Commandant O. Alem IPS (Retd)-i Jubilee salem osang lemsatepdang NAPTC Commandant aser ketdangsertem nem tenüngsang agütsü.
Jubilee sentong kanga junga ayonga amonger aser Ben Longkumer lenisüba kübok NAPTC-i mapa tajung inyakdar, ta O. Alem-i ashi.
Sentong nung NAPTC Commandant, L. Ben Longkumer-i o jembidang Hon jubilee ya meyipa reprangshiba mapang ka lir ta ashi.
Hon Jubilee amongba ajanga NAPTC tashi itdaktsütsü aser temaba jenjang atutsü atema tayongzükba angutsü imlar, ta paisa ashi.
Iba sentong nung Dy. Commandant NAPTC, Limatemsu Longkumer-i anküp tepela o jembi aser PBC Pastor Chumukedima, Rev. Manen-i tenüngsang agüja sarasadem.