Narayanasamy-i Puducherry nung sorkar akumtsü asüngdangogo

Puducherry, May 30 (Agencies): Tanü Congress lenir, V Narayanasamy-i Puducherry Lieutenant Governor, Kiran Bedi ajurua Puducherry nung sorkar akumtsü asoshi asüngdangogo.
Honibarnü züngsem 15 aliba Congress Legislature party nung pa lenir shima liasü. Menden 30 aliba assembly nung DMK züngsem anatia Congress pusemer.
Raj Nivas nung Kiran Bedi ajuruba sülen Narayanasamy-i, pa Congress Legislature Party Lenir shimba dak sentakba shidi LG nem agütsüogo aser sorkar akumtsü atema la dang asüngdangogo, ta metetdaktsü.
Paisa ashiba agi, pai Lieutenant Governor nem DMK-i party pusemba indang shidi-a agütsüogo.
Narayanasamy-isa, tanü nikongdang pa den Puducherry PCC Tir, Namassivayam tena New Delhi-i oa AICC Tir, Sonia Gandhi aser party tatong Tir, Rahul Gandhi na ajurutsü, ta metetdaktsü.
“Kobi melii sorkar tasen akumtsü,” ta paisa shisem.
Arishi küm 69 tain, Narayanasamy ya UPA mezüng sorkar mapang MoS, Parliamentary Affairs inyaka liasü aser UPA II sorkar nung Minister of State in the Prime Minister’s Office inyaka liasü.
Law graduate, Narayanasamy-i 1985 küm yimtenren nung ajemoka liasü.