Narendra Modi-i India nung apu talangtiba lapoktsüogo

Assam kübok Dola nung Prime Minister  Narendra Modi-i Dhola-Sadia Bridge (Bhupen Hazarika Setu) lapoktsüdang agiba noksa angur. (Dola, May 26)

New Delhi, May 26 (Agencies): BJP-i aniba NDA sorkar küm asem abensaba tenüng nung Prime Minister Narendra Modi-i Hokolbarnü India nung apu talangtiba lapoktsüogo.
Dhola-Sadiya apuji Brahmaputra ayong temdanga yanglu. Iba apu ajanga Assam nung Dhola aser Arunachal Pradesh nung Sadiya sendakteper.
Kilometer 9.15 tasazük apu ajanga state ana tsüngda senzütsü asoshi ghonda pezü shi ka tatsüba kümdaktsür.
Tanü apu lapoktsüdang PM Modi-i “iba apu ya Bhupen Hazarika nüngtem nung tenüng jaloktsür” ta ashi.
Tawa tu Patriotic People’s Front Assam (PPFA)-i Bhupen Hazarika ji ajak den kasa aliba nisung ka liasü aser pai telok tila-tulu ajak sendakteptsü ta metetdakja liasü.
Iba olenji Arunachal Pradesh Literary Society (APLS)-ia mulunga agizükba metetdaktsü.
“Asen linük nung iba ya kanga dang tongtipang infrastructure project tem rongnung ka lir” ta tanü Modi-isa ashi.
Sen crore 2,056 endoka yangluba apu lapoktsüba sülen Modi-i apu nung tetsüng agi tatsüka jaja ao. Iba sülen Prime Minister, Union Minister Nitin Gadkari, Assam Governor Banwarilal Purohit, Chief Minister Sarbanada Sonowal aser tongti ketdangsertem gari ka mener apu manung süi.
Tarun Gogoi-i aitsür
Ajisüaka, Assam chief minister Tarun Gogoi-ibo apu talangtiba yangluba atema BJP-i aniba Centre sorkari tenüng agiba atema aitsüogo.
Gogoi-i ashiba agi, iba apu ya Congress-i shisateta yanglutsü tenzükba liasü.
“Iba apu yanglutsüba ya onoki shisatet aser 2009 nung Union Cabinet-i agizük aser 2011 nung mapa inyaktsü tenzük. Navayuga Engineering Company Ltd nem apu yanglutsü mapa lemzüktsü” ta Gogoi-i metetdaktsü.
Paisa, taoba prime minister Manmohan Singh aser taoba road transport minister Oscar Fernandes na dang pelaba metetdaktsü.
“Onoki Manmohan Singh aser taoba surface transport minister dang iba apu yanglutsü mulunga agizükba atema kanga pelar. Iba ya Assam asoshi sempet tulu ka lir aser Assam nungertemi iba sempet atema teti tena dang pelatsü” ta Gogoi-isa shisem.