Narendra Modi-i Varanasi nungi tokteptsü; NDA longjema lir ta sayudak NE lennirtem aden

New Delhi, April 26 (Agencies): Prime Minister Narendra Modi-i Hokolbarnü Varanasi Lok Sabha constituency nungi tokteptsü atema tenüng agütsü.
Tanü pai Returning Officer indang office-i maidang district magistrate indang office nung ghonda tesadang ka ata. Idangji Amit Shah, Rajnath Singh, Sushma Swaraj, Nitin Gadkari, Yogi Adityanath, Himanta Biswa Shama, Nitish Kumar, Parkash Singh Badal, Uddhav Thackeray, Ram Vilas Paswan, M Thambidurai, Anupriya Patel aser North East nungi yimtenren lennirtem pa den sensaksema liasü.
Northeast nungi lennirtem rongnung Meghalaya Chief minister aser NPP tanishir Conrad K Sangma, Nagaland Chief Minister Neiphiu Rio, Assam Finance Minister Himanta Biswa Sarma aser Asom Gana Parishad (AGP) president Atul Bora nungertem dena liasü.
Lennirtem ya BJP-i alizüng ka yur Varanasi-i jaokba liasü aser ibaji NDA longjema aser tashi itta lir ta sayutsü atema liasü.
Modi ya BJP atema dang masü saka NDA indang lennir ta sayutsü atema tanü pai nomination asüba anogo nung BJP lennirtem aser parnok den teyaritepertem aika adentsü jaok.
Tanü Modi-i nomination papers agütsüdang nisung pungui pa mein aser parnok rongnung pezüji Varanasi nungi lir. Par pezüji Annapurna Shukla, Jagdish Raja, Subhash Chandra Gupta aser Ramashankar Patel nungertem lir.
Nisung pungubaji Gujarat nungi Parindu Bhagat lir aser pa ya Modi tembar tajung ka lir.
Modi-i nomination papers agütsüi maodang Bhagwan Kaal Bhairav tekülem ki nung sarasadema liasü.
Lok Sabha elections tatembangba shilem May 19, 2019 nü agitsü aser iba anogo Varanasi nung polling asütsü.