Narendra Patel-i bushisüngdangtsü asüngdanger

Ahmedabad, October 24 (Agencies): Gujarat nung yimsüsür kati pa BJP nung adentsü atema sen crore ka agütsü ta osang metetdaktsü aser tanü pai Gandhinagar nung okadak ka dang iba ken o atema bushisüngdang ka asütsü asüngdangogo.
Arishi küm 47 tain, Narendra Patel-i Deobarnü BJP nung aden. Pa ya Hardik Patel den tesentaktep tajung aliba tanishir ka liasü aser pa BJP nung adenbaji takok tulu ka anguba ama liasü.
Ajisüaka, pa BJP nung adenba sülen ghonda ishika dang lir, Deobar aonung Narendra-i osangbener ka jazük aser idangji BJP-i pa alizüktsü atema sen crore ka agütsütsü nangzük aser iba nungi pa nem sen lakh 10 agütsü ta kuli sayu.
Hardik Patel ya Patidar Anamat Andolan Samiti tanishisang lir aser pai Gujurat nungi BJP agientsü atema alizüng yur mapa inyaker.
Hardik den yariteper tajung ka aliba nungi Honibarnü BJP nung adener Varun Patel-i pa mesüzük ta Narendra-i yasüng ashi.
Ajisüaka, Varun aser BJP naprongi Narendra-i ashiba onükji magizüker aser state election jakdang Congress-i tasa atonga inyaker ta meyiper aitsüogo.
Narendra Patel-i tanü benokba ken o ji asüng okadaki angadangtsü.
Hardik Patel-i pa yimsüsür ka masü aser pa Congress atema inyaktsür nisung ka masü ta ashir.
BJP-ibo Hardik’er telokji state nung opposition Congress indang “B-team” ta ajar.
Hardik-i paji activist ka aser 2015 küm BJP anema tentetba Patidar Anamat Andolan Samiti tanishir ka ta ashir.