Naro aser aonsotsü tsünüba training tembanogo

Kohima, August 9, 2019: Hokolbarnü Kohima nung Directorate of Horticulture Conference hall nung naro aser aonsotsü tsünüa anepalubayim training nung Addl. Director Horticulture, Qhutovi Wotsa-i okila jembiba noksa nung angur. 

Kohima, Luroi/August 09, 2019 (TYO): Directorate of Horticulture, Kohima Conference Hall nung August 08 nungi tenzüka 09, 2019 nü tashi naro aser aonsotsü tem kümzüka tsünüsempongba aser achaayangba nung training sentong ayongzükja liasü.
Anogo ana tashi agiba training sentong ya Saveer Biotech Limited, New Delhi aser Meghastar Agro Horti Pvt limited, Guwahati na den longjemer Department of Horticulture-i ayongzükja liasü.
Sentong nung Addl. Director of Horticulture, Qhutovi Wotsa-i jembiba mapang pai, tanga tesemi product tajungtem yoktsüsa Nagaland nung teinyaktsü aser temelenshitsüla aika dang lir, iba dak alia, inyaktettsüsa tashi liaka state-i shishilembaba mapatong matalokdaktsütetter, ta ashi.
Nagaland ya tzü mopung ajungba den ali temo peria aliba tesem ka lir, koba naro aser aounsotsü tapu ajunga tsünütsü asoshi tetemjem aser ibaji maongka tajung, ta Wotsa-i ashi.
Aluruba mongpu den medemdanga inyaktsüla, ajiasünungang talirtem aser consumer temi akhangba peridaktsütsü, ta Wotsa-i training nung adenertem dang metetdaktsü.
Mapa adokdaktsütsü aser tzü mopung merüka ayutsü atema sentong balala nung artificial naro melena pei atsü mesüra alu nung tsünüba naro tem amshitsü asoshi, Wotsa-i ajungshia liasü.
Talir mesüra consumer temang nung timtem madokdaktsütsü aser parnok ajangzükdaktsütsü atema chemical mozü tajungtiba amshia anepalutsü asoshi training nung adenertem dang Wotsa-i mepiashi liasü.
Talirtemi saputsüsa aser ibaji ajanga shishilembaba tsütsü aluyimtem ajangzüktsü asoshi naro aser aonsotsü tapu balala shima tsünütsü asoshi Wotsa-isa training nung adenertem nem tajungshiba agütsü.
Kasa sentong nung, Deputy Director of Horticulture, S. Senka Jamir-i, narotem nung nübur takhangba kanga dang melungi ainba ajanga, Horticulture sector nung floriculture ya tajangzük aketba shishilembaba ka kümogo, ta ashi.
Naro aser aonsotsü tem jenjang keta aser jenti tsünütettsü atema iba training sentong ajanga ajangzüktsü, ta Senka-i imlaba ka lemsatep.
Maneni, tanünübuba training sentong nung shisalen sayurji Dr. Hema Kumar Makhure, Saveer Biotech Limited, Delhi aser Gunin Roy, Meghastar Agro Horti Pvt Ltd, Guwahati na liasü.
Mezüng technical session agiba mapang, training nung adenertem dang Lillium, Gerbera & Carnation aser Tomato/cherry tomato tsünüsempongba indang nung tatsütsü rasa ashi. Iba sülen, tanabuba technical session nung Asst. Horticulture Officer, T. Eluba-i Management of Poly house indang nung jembia liasü.
Iba training sentong ya Mission for Integrated Development of Horticulture (MIDH), Ministry of Agriculture Cooperation & Farmers Welfare, Govt of India kübok sponsor süa liasü. Training sentong nung district ajak nungi nisung 80 agi denogo.