Naro melen kaket ang agütsütsüla: PM Modi

New Delhi, June 17 (Agencies): Ato kilonser, Narendra Modi-i mapang shia tasentasen purapiteter jembir, aser maneni Honibarnüa pai, “Narojung masü saka kaket ang ka agüjang,” ta ashi.
India nung azüng-zülu metetba, literacy rate shilem 100% aliba state, Kerala nung ‘Reading Month Celebration’ sentong nung jembidang Ato kilonser Modi-i, “Tepela sayudang narojung masü saka kaket ang ka agütsütsü ni nüburtem dang mepishir. Ibaji ajanga temelenshi tulu adoktsü,” ta metetdaktsü.
“Kaket azüngba nungi jangratem anguba tepela dak alia tanga tepela mali, aser shisatsü nungi tashi tulu anguba dak alia tanga tashi tulu mali,” ta paisa ashi.
Ato kilonser, Narendra Modi-isa, Kerala state nung literacy rate ajungba atema nisung aikati tenüng agitsü temsüa lir, ta ashi.
“Kerala-i shisaliok nung takok angubaji sorkari inyakba kija ajanga masü. Sensotem aser lokti tentettemia tongtibang shilem agiogo,” ta paisa ashi.
Lokti atema kaketnang (library) ji kanga tongtibang ta jembia inyaksang, PN Panicker mapatem bilemteta Modi-i nüburtem ayongzüka liasü.
1945 küm Panicker-i kaketnang 47 indang network ‘Grandhasala Sangam’ tenteta liasü. Tangbo iba network nung Kerala kübok jila aser yimtsüngtem nung aliba kaketnang 6,000 den timba lir.
“Kerala nung library network aser Kerala Grandhasala Sangham ji PN Panicker ajanga lir. Kasa tanela nung ni Gujarat chief minister inyakdang ni-a ‘Vanche Gujarat’ tenteta liasü,” ta Modi-i ashi.