Naro Tongkong (Ungma) nung ICIT Campus Tenla ki semzükogo

Mokokchung, October 13 (TYO): Deobar nü, Oct. 11, 2015 nü Ungma Baptist Arogo Sannüker, Rev Noklen Lkr-i Mokokchung, Naro Tongkong (Ungma) nung aliba ICIT Campus nung United Christian Fellowship Tenla ki meshiteta semzüktsüogo, ta Church Building Planning Committee-i sangdong ka ajanga metetdaktsü.

Iba sentong nung jembidang, Noklen Lkr-i, “Khristantem temang aser tanela naprongji Tsüngrem Tenla ki lir, anungji mapang ajak nung pei taküm libaliro ajanga Tsüngrem sentsüwangshidaktsütsüla,” ta ayongzük.

Tenla ki meshiteta lapokba sentong nung mendenji Wt. Alipokla Lecturer liasü aser Sumi Settsu Sannüker, Khehovi Aye-i temoatsü meshia sarasadem.

Sentong nungsa ICIT Principal, Tiakaba Amer-i o tatsüka jembidang, Institute tenüng nung Odisha Angh, SC Jamir-i Institute Tenla ki yanglutsü atema kimong tenlaba atema pa aser par kibong dang pelar, ta ashi.

Principal-isa, iba fellowship building ya denomination kecha tebendang makai Khristan ajak asoshi lir, ta shisem.

Iba Tenla ki takok ngua yanglutettsü asoshi sarasadem, nüngdakba oset balala aser senotsü agi tenlar kija- kibongtem, Arogotem aser temeimer ajak dang pelar, ta Planning Committee aser ICIT nung alirtemi kasa sangdong nungsa metetdaktsü.