Narongjaker Geeta India-i anir arutsü : MEA

New Delhi, October 23 (Agencies) : Küm 10 tejaklen India tsür narong jaker ka memeteti arrtsü adena Pakistan-i aoba October 26, 2015 nü linüki meyipa anir arutsü, ta MEA-i Hokolbarnü metetdaktsü.
“October 26 nü Geeta India-i meyipa arutsü. La meina Edhi Foundation nungi züngsem 5 arutsü” ta MEA otongdar Vikas Swarup-i ashi.
“Geeta’er kibong ta tenüng agiba jangjatsü atema onoki DNA tendangtsü. DNA tendangba nung kuli shitak ngutetra Geeta parnok ket nung agütsütsü. Aji mesüra la yaritsü atema reju kar onoki shima lir” ta paisa ashi.
Geeta tebu ta kuli agütsüsangji Janardhan Mahto lir. Pa ya Bihar kübok Saharsa district nungi lir aser pa jabaso 5 aser jala ana lir. Pai ashiba agi Geeta ji par jala tantsüla Heera lir aser la ya 2004 küm benjung ka nung sama.
Salman Khan-i tongti shilem agiba “Bajrangi Bhaijaan” film otsü den mesüktepba ajanga Geeta indang otsü ya kanga nüngtugu kümogo.
Arishi küm 21 tain Geeta ya küm 11 asüdang Pakistan Rangers-i Lahore railway station nung Samjhauta Express nung la kija mena aliba angu.
Iba sülen police-i la Lahore nung Edhi Foundation-i anir ao aser idak nungjagi la Karachi-i anir ao.
Taküm August ita Pakistan nung Indian High Commissioner, T C A Raghavan aser kinungtsü nati Geeta semdanga liasü.