NASA-i ano ita-i nisung yoktsü: Pence

Washington, October 06 (Agencies): Red Planet aser tanga tesemtemi astronaut tem meyok tsüngda Trump administration ajanga NASA dang ita-i tanaben nisung yoka ita ma nungji nisung aliba sayutsü tetuyuba agütsü, ta US Tatong Tir, Mike Pence-i metetdaktsü.
Pence-i aministration-i bilema aliba indang osang ya Wall Street Journal ajanga metetdaktsü, aser iba den külemi ano National Space Council semzüktsüba sentong nung o jembiba mapanga ashi — National Space Council ya US space tebilemtsü asoshi tang tasensa shia aruba telok ka lir, ta Brihostibarnü osang ka ajanga metetdaktsü.
“Onoki NASA astronaut tem ita-i tanaben meyipa tudaktsütsü – tsüngnep aser wako yutsütsü atema dang masü saka tamendakdak yanglutsü asoshi onoki America nunger Mars aser item tesemtemi yoktsü,” ta pai pai Smithsonian National Air & Space Museum indang Steven F. Udvar-Hazy Center, Chantilly, Virginia nung osangbenertem dang ashi.
Pence-i, anüngklak mapaji linük asoshi mezüng nüngdakba mapa ka lir, ta jangjashitsüba olen ka tang NASA nung Administrator ka ama inyaka alisang, Robert Lightfoot-i iba council indang mezüng senden temli sangdong ka ajanga metetdaktsü.
“Tatong Tirisa ano anünglak nung U.S. leadership akhangshiba indanga ashi – Tir dang nungi temelaba agir sülen NASA-i anir iba inyakyim mapa küma tejakleni anitsü,” ta Lightfoot-i ashi.
“NASA dang iba inyakyim asoshi meraksatetba sentong telemtet ka yanglua international partner tem den sentakteper solar system nung meimchir mapa tenzüktsü tetuyuba tejangja agütsüogo. Mapang talangka sülen ita-i meimchir tanaben yoktsü aser iba den ano Mars aser tanga tesemtemi dena yoktsü sentong tulu yanglutsüla,” ta Lightfoot-i shisem.
Council-i cis-lunar space (ita lunga aliba tesemtem) kechi koda tongtibang ibaji agizükogo – item tesemtem ya Mars aser tanga tesem nung mission tenzüktsü asoshi tamendakdak tesemtem asütsü, ta Lightfoot-isa ashi.