NASA-i electric tashi agi ayimba tayimtsü yanglutsü

Washington, June 18 (Agencies) : Lipoküm nem timtem magütsütsü aser ola o nanüng ajemtsü atema US space agency-i electric tashi agi ayimba tayimtsü, X-57 technology amshia yanglutsü atema sentong yangluogo.
Tanga tayimtsütem dang nungi balaka yangluba tashikang nung electric motor 14 agi propellers tem longdaktsütsü aser NASA-i ibaji technology X-57 amshia tendangtsü. Iba tayimtsü nem parnoki “Maxwell” ta tenüng agütsüogo.
“Tayimtsü yangluba otsü nung tan yangluba X-57 ya ajanga temelenshi bentsür arutsü,” ta Hokolbarnü NASA administrator Charles Bolden-i Washington, DC nung ‘Aviation 2016’ sentong akaba mapang ashi.
James Clerk Maxwell nem akhümtsübu agütsüba temaitsü iba tayimtsü nem onoki Maxwell ta tenüng agütsü. James Clerk Maxwell ya 19 century mapang Scotland nungi nüngtugu physicist ka liasü aser pai electromagnetism tsütsü mapa kanga tulu inyakteta yutsü.
NASA-i Italy nung design asüba, engine ana keta aliba “Tecnam P2006T” aircraft ka yanglushia X-57 tayimtsü ya yanglutsü.
“Tecnam P2006T” aircraft dak mezüng yongi keta aliba tashikang den totzü atsükba engine anaprongla melentsü. Tashikangji electric motors 14 inoka yangluba tashikang ka agi melentsü. Motor 14 rongnung 12 tayimtsü anüngleni yimketa atudang aser alileni yimazüka aludang amshitsü aser tashikang anatsülen motor tulu kaka inokbaji ajanga tayimtsü mopung nung teyimdak nung yaritsü.
Iba tayimtsü nung electric motor tem tsüngda tashi lemsatepba ajanga akhi tayimtsütem dang nungi tashi pongusü agi tajemba agitsü ta NASA-i imlar.
“Maxwell” tayimtsü ya battery agi ayimtsü aser ibaji ajanga tayimtsü nungi carbon madoktsü.
X-57 technology agi yangluba tayimtsü ajanga nüburtem mapang kanga kümzüktsü, totzü kümzüktsü aser tayimtsü tanga dang nungi noklang nung shilem 40 agi dalangba asütsü.
Tayimtsü tanga nung totzü agi mapa tajungba inyakdaktsütsü atema yimtet apia kara mayimer. Ajisüaka Maxwell nungbo Electric propulsion ajanga item ama tetsükdangtsü agientsür aser koma kara yimteter yamaji ayimtsü.
1947 küm mezüng X-plane, X-1 yanglu aser iba tayimtsü jagi ola dena tekaraba yimteta liasü.
“Iba sülen X-planes tapu aika yangluogo aser item ajakji aviation & space technology tsütsü tajangzük kanga bentsür aruogo,” ta NASA Aeronautics Research Mission Directorate nung associate administrator, Jaiwon Shin-i ashi.
“X-57 tayimtsü aser anosa yanglutsü aliba tayimtsütem ajanga ano terenlok tali bentsür arutsü imlar,” ta pai ashi.