Nashi külemba/kümzükba tenüng nung nisung tepsetba magizüktettsü: PM Modi

New Delhi, June 29 (Agencies): Brihostibarnü Ato kilonser, Narendra Modi-i, nashi külemba aser kümzükba tenüng amer nisung tepsetbaji tagizüktetla masü, ta aitsü.
Tanü Ahmedabad yimti nung Sabarmati Ashram küm 100 ajungba sentong nung jembidang Modi-i, “Gau Bhakti tenüng amer nisung tepsetba ya tagizüktetla masü, Mahatma Gandhi-ia iba ya magizüktetla. Linük nung nisung shinga daka pei teka nung ozüng amtsü temeten mali,” ta ashi.
“Asen linük ya rara mamshiba linük ka lir. Asen aliba linük ya Mahatma Gandhi aliba linük lir. Kechiba asenoki ibaji amadoker?” ta pai asüngdang.
Modi-isa, nashi kümzükba mapaji inyaktsüla; Mahatma Gandhi aser Acharya nati nashi kümzüktsü atema jembiba amabo shingaia jembia mali. Ajisüaka nashi kümzükba tenüng amer nisung tepsetbajibo Mahatma Gandhi-ia magizüktetla, ta ashi.
Modi-i anogo ananü atema par state, Gujarat semdanga arua lir, aser iba mapang nung pai Ahmedabad, Rajkot, Modasa aser Gandhinagar nung sentong balala nung adentsü.
Modi-i jembiba o dak sendakba nung tanü opposition lenirtem- Asaduddin Owaisi, Mamata Banerjee aser Congress party-i, Ato kilonseri jembiba oji o dang lir, o kija agi jembibaji teperi masü, ta aitsüogo.
Twitter ajanga All India Majlis-E-Ittehadul Muslimeen Party tongti lenir, Owaisi-i, “Nai jembiba ama mapa agia inyakang, Ato kilonser,” ta ashi.
Trinamool Congress tongti aser West Bengal Chief Minister, Mamata Banerjee-ia, “Nashi külemba tenüng nung nisung tepseter. Iba ya anentsüla. O kija agi jembibaji teperi masü,” ta ashi.
Osangbenertem den jembidang Congress otongdar aser taoba mapang Union Minister, Manish Tewari-ia, “Linük nung ozüng mamshiba tensa ya shirnok ajanga tenzük, ibaji Ato kilonseri shisadangtsüla. O kija agi aitsüba jagi teperi masü,” ta aitsü.