Nashi kümzükba anentsü atema Muslim, Khristantemi akhanger

New Delhi, September 23 (Agencies): Hokolbarnü New Delhi, Jantar Mantar nung Muslim, Khristan aser Dalit tentet balala aikati ‘nashi kümzükba’ anentsütsü aser Communal Violence Bill agizüktsü atema takhangba agütsüogo.
Longkak aita takhangba agütsürtemisa shidi ka ajanga Tir, Pranab Mukherjee dang, tang Centre nung NDA sorkar yimsüsüba kübok timtem reshikangshia tia ajurur nüburtem temeten temzüng nung aliba ama kümzüka ayutsü atema pai pa shilem agidaktsüner, ta mepishi.
All India Muslim Majlis-e-Mushawarat Tir, Navaid Hamid-i, “Nashi kümzükba maparen onoki anendaktsüner aser nüburtem nem peii mulungba chiyungtsütem achitsü temelaba agütsüdaktsüner,” ta ashi.
Jamat-e-Islami Hind tatong Tir, Nusrat Ali-ia, “Tawa tatalokbatem ya yimtenren party temi vote angutsü atema inyakba asü masüar kuli bushitsü atema Commission ka tentettsüla,” ta ashi.
Jamiatul Ulama Hind General Secretary, Maulana Abdul Hameed-ia, Dadri, Dingerhedi aser Paida yim nung tatalokba keno tulutem aser Ahmedabad nung nashi kümzükertemi lanur ka tepsetba kenotemji ozüng amertemi bushitsüla, ta takhangba agütsü.
“Linük nung tzüzüng-ozüng azüoka ayutsü atema lokti balala tsüngda makmakshimak adokdaktsür nem temerenshi tulu agütsütsü asoshi Communal Violence Bill ji tekaraba nung ozüng akümtsüla,” ta paisa ashi.
Communal Violence (Prevention, Control & Rehabilitation of Victims) Bill, 2005 ajanga tamangba lokti tsüngda raraba nokdangtsü aser azüoktsü, tekaraba nung bushisüngdangtsü, ken o akatsü aser item ama tatalokba ajanga takoksa angurtem nem teyari agütsütsü asoshi sorkar nem tashi agütsür.
Tanü longkak aitba sentong nung shilem agirtem rongnung tanga tentettemji Lokraj Sanghtan, Dalit Federation AMOD, All India Shia Council aser Students Islamic Organisation of India liasü.