Nashi kümzükertemi shinga metsübutsüla: Mohan Bhagwat

Nagpur, October 1 (Agencies): Nashi kümzükba ya tamangba yimsü nungi pilar lir anungji nashi kümzükertem (Gau Rakshaks) tetsübu melii mapa inyakang, ta Rashtriya Swayamsewak Sangh (RSS) tanishir Mohan Bhagwat-i metetdaktsü.
Sorkar mesüra Supreme Court nung tongti nisungtemi nashi kümzükba anema jembiba atema Gau Rakshak tem temulung ila mebilemtsüla, ta Bhagwat-isa metetdaktsü.
PM Narendra Modi aser Supreme Court nungeri nashi kümzükertem dak tai tongloktsütsü atema ozüng alema mapa inyakba aibelena meyipzüka jembir, ta paisa shisem.
“Ozüng alema mapa inyakertem aser tashiyim amshirtemi ang iba atemaji shisabulutsüla” ta Bhagwat-i ashi. PM Modi aser SC nungeri nashi kümzükertemi inyakba mapa anema jembiba atema pai iba olen metetdaktsü.
RSS indang foundation day nung o jembidang Bhagwat-i ‘tawa bushisüngdang balala asüba ken o tem rongnung nashi kümzükertem indang dena mali’ ta ashi.
“Nashi kümzükertem aikati timi dang nashi kümzükba mapa inyaker saka parnok amaker aser tepseter. Ajisüaka, nashi kümzükertem indang onükbo mejembir mesüra masüngdanger” ta paisa metetdaktsü.
“Nashi kümzükertem mesüra nashi kümzükba maparen ozüng alema mapa inyakba den sendaktepbaji tim masü. Ajisüaka, nashi miima shibelenba aser talisa Bangladesh arrtsü anasa belenba ajanga nashi kümzükba aser ajungketba maparen tongtipang kümogo” ta RSS tanishisangisa shisem.
Tamangba yimsü balala nungi nisungtemi nashi kümzükba mapa inyaker aser Muslim nunger nashi kümzüker aikati kü dang nisung kari India nung tamangba yimsü balala tsüngda mepetmesü adokdaktsütsü atema tasa ka atonga inyaker ta shiogo, ta Bhagwat-isa ashi.
“Nübortemi aginüba ama nashi kümzükba aser nashi ajungketba maparen inyaka aotsü aser tarutsü anogotem tuluba nung inyaktsü” ta paisa shisem.