Nashi kümzükertemi tongti shilem agir : Mohan Bhagwat

Nagpur, October 11 (Agencies) : “Nashi kümzükertemi tongtipang shilem agir aser nashi kümzükertem o pei sasa inyakertem tsüngda tebendang metetttsü tim” ta Rashtriya Swayamsewak Sangh (RSS) tanishir, Mohan Bhagwat-i ashi.
“Hindu nungeri kanga akhümtsübuba nashi ya ozüng ajanga kümzüka ayutsüla. Ozüngi melaba ama inyaker vigilantes mesüra gau rakshaks-i tongti shilem agir” ta Bhagwat-i ashi.
Nashi tepsetertem ta tai tonglokja merenshiba tatalokbatem atema taküm August ita Prime Minister Narenda Modi-i “Ni khenkhenbo kanga jashir. Ozüng alema inyaker kari gau rakshaks tenüng amer inyaker” ta ashi.
Gau rakshaks mesüra nashi kümzükertem ta ser teloktemi mapa inyakba ajanga Gujurat densema linük tesem balala nung tamangba yimsü aser nisung telok balala tsüngda mepetmesü adokdaktsür, ta BJP aser RSS aitsürtemi ashir.
Taküm July ita Dalit nunger lanur pezü mangsa kümdaktsüba sülen gari ka nung alenloker züka merenshi. Par pezü jagi nashi tepset ta tai tonglokja merenshi saka shitakba agibo par pezüji nashi tasü ka nungi teküp agidaktsürba liasü. Iba mapa ya Dalit nunger ama teküpoktiba jenjang nung alirtem nemsa inyakdaktsür.