Nashi metepsettsü aser Nashi shi achiba nokdangba nung teshisadangtsü olen kar

~ L. Kika Pongener. 

Tang centre sorkar National Democratic Alliance nung samanir-ji BJP party lir. BJP party züngsemtemi ashiba agi BJP ya Secular party ka lir, BJP party manifesto nung India lima ya Hindu lima ka akümtsü ta kecha mali, aser BJP party-i Hindutva tangatetba nung ajemdaker maparen ajak inyaker ta jembibaji tiyazü ta ashir. Ano BJP party ya Rashtriya Swayamsevak Sangh (RSS) nung yimtenren kongsang ka ta jembiba ajakji tiyazü olulu jembirba dang ta ashir. Ajioda, 2014 küm kodang centre nung BJP party-i aniba NDA sorkar tashi aru, iba mapang nungi India nung Nashi metepsettsü aser Nashi shi achiba nokdangtsü ozüng yanglutsü tenzük. Tongtipangsa BJP-i yimsü asüba State-tem ajunga nung, iba ozüng ya sashi-sashia inyakyonga ao. Kodang iba ozüng yanglua tenzük, Mizoram aser Meghalaya state nungbo kaketshirtemi anir nübortem ajaki ola adoka iba ozüng anema nokdak. Talisa Meghalaya nungbo Centre nungi Minister ka arudang, Nashi shi achiba benjong ayongzüka mapa agi inyaka sayuba kuli tejangja osang kaket-tem nung nguogo. Ajisüaka asen Naga lima noklang shilem nung 99% Christian lima ka, yimjak nung Naga limaji Khrista asoshi ta sangdongba lima ka, saka shingaia kecha ola kata madok.
Nashi metepsettsü aser Nashi shi achitsü nokdangba dang masü, saka India lima tesem aika nung Khristan-tem tekülemdak Tenla-ki amakba aser raksatsüba, Pastor-tem aser tamangertem reshikangshiba aika inyaka aruba tejangja kuli lir. Aser Hindu nunger shirnoki iba ama Khristantem reshikangshia mapa tamajung inyaker item anema-ji police station-i oa FIR lodge asünung police-temi magizükba osang-a karbo lir. Ano aji dang masü item Hindu nunger RSS teloki reshikangshiba nungi ajenertem, police-temi kümzüktsü teimla nung parnok dak jenoktsü aonung, meyiper police-temi parnok merenshiba-a tesem kar nungbo atalokba otsü lir. Item ajakji jungjunga reprangdangra koba state nung BJP-i yimsüsüba tashi lir item state-tem nung teimba ataloker. Aser shirnoki tashiyim mapa tamajung inyaker item nisungtemji-a RSS & BJP züngsem-tem tesa lir. Ajiser Khristan-tem Tenla-ki dena raksaja tamangertem reshikangshiaka, yimsüsüri anir ozüng ammertemi tenük agi mangu, tenarong agi mangashi-i odang toktsübaji ngua item mapa tamajung inyakba ajungaji parnoki ajungmesor amai kuli sayur. Hau ta süaka, nunga ta süaka, RSS den BJP party-ji tesendaktep lir ama item kulitem jagi sayur.
Ajioda, BJP party manifesto nungji-bo jakdak-jakdaka-bo tangar tamangba yimsü anema inyaktsübo zülua malitsü südi, ajisüaka centre nung tangar party-i yimsü asüdangbo yamala mapatem ya kangara-bo meinyaker, saka kodang centre nung BJP-i aniba sorkar tashi arudir, idangji-ang iba ama mapa ya talila temulong ulua inyaker. Ajiser ozüng ammer sorkar ketdangsertem-ia nokdangtsü melena meyiper parnok tepu akümer. Anungji item kuli ajak jagi Khristantem aser tanga yimsü anema mapa tamajung inyakba ya BJP party-i ajungmesor ama temulong melemi bilemer. Ano item dak alaka, NDA sorkar tashi arur mapang tatsüka tsüngda nung Khristantem atema tongtipang benjong-bentsü aser anogotem nung Hindu nunger aser sorkar tongtipang sentongtem amongtsü telemtetba agiba, itüm kuli ajunga jagi BJP party inyakyim nung tashishitsü ketdaktsür. 1960’s nung “The Prevention of Cruelty to Animals Act” passed asü südi. Hindu nungertemi ashir, Nashi-i mamatzü agütsür, aser pa teküp aser temezüngji osetsüset yanglutsü senti oset, anungji kümzüka ayutsü kanga tongtipang. Surabang, Nabong-ibo mamatzü magütsür asü…? Ajiser Nabong tezüng aser temezüngji-a senti oset masü na ??? An-i entsü kotsür aser la tezüng jagi tagitsü oset meyanglur no ??? Hindu nungertemi benjongbentsü ajak nung kanga sapua achiba shi-ji Nabong shi aser An shi achir. Aser India lima jila tulu-tila ajunga bazaar-tem nung kima yimdong ajak südaka Nabong aser An lepseta ayokba dokan-tem angutsü. Sürabangla 1960’s Animals Act nung ajemdaker Nashi dang balaka kechiba nokdanger…? Arok külem India nunger senso-sa sernung Christian aser Muslim nungeri achiba Nashi shi-bo nokdangtsüla aser Hindu nungeri achiba Nabong aser An shi itemji-bo menokdangtsü no…?
Sürabang India lima nung ya Hindu nunger atemabo Citizenship Status balaka yanglua ali asü koda…? Christian, Muslim aser Minority kintem yabo 2nd class aser 3rd class citizen asü koda…? Anungji India lima-ji Secular state ka sürabangla, senso ajunga saku temeden akatsü asoshi asen state sorkar yimsüsürtem-ia tasü-ita iba atema jembitsüla aser nokdaktsüla.