Nashi natzü aser scü agi coronavirus shirang aneptsü: Suman Haripriya

Guwahati, March 2 (Agencies): Nashi natzü aser scü agi coronavirus tashidak anepdaktsütettsü, ta Assam nung BJP MLA kati ashi.
“Iba yagi (nashi natzü aser scü ) cancer keta alirtem aneptsür. Iba indang kuli lir. Gujarat nung Ayurvedic hospital ka nung cancer agi shirangertem dang nashi scü nüloktsür. Parnok nem nashi natzü aser scü agi yangluba mozü agütsür” ta MLA-i ashi.
“Anungji asenoki kasaji coronavirus anepalutsü asoshi amshitettsü,” ta Hajo MLA Suman Haripriya-i Hombarnü Assam Legislative Assembly budget session nung jembiba mapang ashi.
BJP MLA-isa, külemküjaba mapang nashi natzü aser scü kechiba amshitsüla, iba ya science tsütsü kuli lir.
“Iba inyakyim ajanga cancer agi shirangertem anepba ni angazükogo. Ibayongji tetsü tebou mapang nüburtemi nashi külema liasü. Nashi-i agütsüba ajak ya kanga tongtibang lir,” ta laisa ashi.
Taoba mapang Hindu Mahasabha-ia, nashi natzü aser scü ya coronavirus anepalutsü asoshi amshitettsü ta ashiba Outlook osangkaket ajanga metetdaktsüogo.
“Nashi natzü aser scü achiba ajanga coronavirus tashidak nokdangtsü. Nisung shibai Om Namah Shivay ta shia pei temang nung nashi scü nülokdir pa kümzüktsü. Coronavirus tepsettsü asoshi yakta külemküjaba ka agitsü,” ta Hindu Mahasabha tir Swami Chakrapani Maharaj-i ashi.
Coronavirus tashidak agi China nung nisung 3,000 dak tema süogo, aser alima ajunga nung nisung 89,000 dak tema menaa lir.
Union health ministry sangdong ka ajanga ashiba agi India nung nisung ana dak novel coronavirus aketba putetogo. Tenaji ka Delhi nung aser ka Telangana nung lir.