Nashi nem ‘Linük tetsü’ jenjang agutsütsü atema akhangtsü

New Delhi, Tsüklai (February) 16 (Agencies): Nashi nem ‘Linük tetsü’ jenjang agütsütsü atema Tsüklai 18, 2018 nü New Delhi nung aliba Ramleela Ground nung lokti senden ayongzüka takhangba agutsütsü, ta tamangba yimsü putir, Gopal Mani-i metetdaktsü.
BJP MP, Subrmanian Swamy-ia item takhangbaji pusemtsü ta shiogo, ta pai ashi.
Iba sentong ya Bhartiya Gau Kranti Manch-i ayongzük aser iba sentong nung yimtenren nung tongti lenirtem aser loktiliba balala nungi lenirtema adentsü.
Gopal Mani-isa, iba lokti senden tembangba sülen pai Ato kilonser, Narendra Modi ajurua takhangba onük kar agutsütsü, ta metetdaktsü.
Osangbenertem den jembidang Mani-i, “Nashi ya shiruru ka ama masü saka tetsü ka ama züngshi nungang linük nung nashi tepsetba anentsü,” ta ashi.
Ano tanga takhangba onüktem rongnung, nashi kümzüktsü atema sorkar ministry temeja ka tentettsü, sorkari nashi scü alitsü aser nashi taintem nem teyari agutsütsü dena lir, ta paisa ashi.
“Nashi ya kanga senti, aser research ka ajanga ashiba agi, nashi crore 17 indang scü agi linük nung gas atsükba aser totzü belenshiba nüngdak peritsü,” ta paisa ashi.