Nashi shi benjung ayongba atema Osmania University kaketshir 12 apu

Hyderabad, December 11 (Agencies): Nashi shi mesüra ak shi benjung mayongzüktsü atema court kati tuyuba anema nashi shi benjung ayongba atema Osmania University (OU) Campus, Hyderabad nung hostel takdang nungi kaketshir 12 puogo, ta Hokolbar nü police-i ashi.
“Kaketshirtemji yasüng apu. Court ken o mezüngmeshiba kübok onoki parnok puogo,” ta police ketdangser kati ashi.
Kaketshirtemji Hokolbar nü court matsüngdangi anir ao. Brihostibar nü OU nung tensa tera mejungi akum, saka tanübo tensa süngjema liasü.
Kaketshir telok kati, parnoki ‘World Human Rights Day’ anogomung denjia December 10 nü University campus nung ‘nashi shi benjung’ ka ayongzüktsü ta sangdonga liasü. Ano tanga telok kati-a kasa anogo nung ‘ak shi benjung’ ayongzüktsü tebilemba lir ta sangdonga liasü, koba ajanga telok ana tsüngda rara adoktsü akok ta bilema liasü.
Ajisüaka Brishostibar nü police-i kaketshirtem sentongji raksatsüogo.
Kaketshir kari ashiba agi, parnok hostel takdang nung nashi shi benjung kaogo.
Anogo asem tejaklen city civil court-i nashi shi benjung ajanga Cruelty Towards Animal Act & Cow Slaughter Act alema inyaker aser nüburtem mulungsentsü yirutsür, ta ashiba sülen Bodhbar nü High Court-ia city civil court tetuyubaji nungitogo.