Nashi shi dang masü

Atangji, akok nungbo nashi shi dang masü saka kecha shia machi tajungba, kechiyong shiruru tapu balala shi achiba ajanga asenok temang ya shiruru leper ama kümadoker. Ibaji tesempatsüka. Ajisüaka, nisung ya  shi achiba shiruru  mesüka yanglua lir, iba jagi tanü ama nisungtem nüchi makümba putu nunga shi aser ango chia taküm lia aru. Iba jagi tamangba yimsü kar dak alaka tamangba yimsü teimbai shi achitsü melar. Atangji, shi achirtem rongnunga kari ak shi machir saka ano karibo shi tapu ajak achir. Aji oda, Khristan purtem asoshi tasen Laishibai teyubajibo kechi chiyongtsü chidir aser jemdir, ibaji Tsüngrem nem tenüngsang agüja chiajemtetra, ibaji Tsüngrem tsüngdang tagizüktettsü asütsü. Anungji, Khristan-tem asoshibo kechi shi achitsüla aser kechi shibo machitsüla, iba list-jibo mali saka ibaji pei tamang aser tangatetba dak keta lir. Iba amaji tanü India nung BJP teloki aniba Center government-i nashi metepsettsü ozüng azüngbaji shi mechidaktsünüba otsü ka masü saka tamangba yimsü dak ajemdaker inyakba mapa ka lir. India ama ka asoshi ibaji kanga lendong lir, kechiyong India ama kin kidong aser tamangba yimsü alima nung aliba ajak amenoka aliba lima ka nung yimteni sensosanger asoshi chiyongtsü list (menu) yanglutsütsü makok. India lima nung alir sensosangertem ya Tsüngrem dak mamangnüra mamangtsü aser amangnüra kechi yimsü amangnüdir amangtsü asoshi temzüngi temeten sademsadema lapokja lir. Ajisüaka, kodang teimbai amangba yimsü kübok sensosanger ajak ayutsü merangdir, ibaji linük temzüng anema yimteni inyaker asütsü aser iba jagi India ya linük aika küma lemsa tenzüktsü. Kechi yimsü südir süang tamangba yimsü yabo kangshia amangdaktsütsüba mapa ka masü. Akhidang, asenoki Naga lima anüdoklen alirtem kar amokmerena kangshia amangdaktsüba agi tang tashi parnoki Khristan yimsü yabo tashiyim agi inyakba tetsübutsü yimsü ka amato bilemer. Aji oda, Nagaland nung alirtemi “Nagaland ya Khrista Asoshi,” ta pangzüng küma latetaka, Nagaland nung alir ajak tashiyim agi kangshia Khristan kümdaktsütsü ta masü saka akok tashi Yisu Khrista dak mamangertem dang Tsüngrem temeim shia temeim agi temulung meyipdaktsü tenangzükba agiba mapa ka lir. Iba kasaji India nung Hindu nungertem dak tangatetba alitsüla. Ajisüaka, tangbo All India Hindu Conventioni anir India ya Hindu lima ka akümtsü tangatetba aser telemtetba lir. Iba jagi Hindu nunger masürtem temulung kanga yirutsüogo. Aji oda, nashi metepsettsü aser nashi shi mayoktsü aser bener mesenzütsü temzüng azüngba anema tesem balala nung lanur aser kaketshirtemi longkak ait tenzükogo. Nagaland nung ola madoker dang ashi asenoki Meghalaya aser Mizoram nungbo linük nung nashi metepsettsü ozüng agütsüba anema nashi shi benjong ayongzüka amongba nguogo. Tanü India lima nung Khristan-tem asoshibo tamang tendangba mapang ka amato kümogo. Aji oda, sen ngura ojang mesüra Ruling party nung denra ojang ta asüba tejangraba aser tangatetba dak alaka asenok ya Khristan-a ta asüba tobo amadokogo. Ashiko, aoksaa Deobar arudang khenkhen bilemteta alitsüa akok. Ajisüaka, küm noklang ka jakdang asenok shiruru ama tia nung tetsübu agi sünger tesamar lia asenok kümzükba Kibur kümtetdakba aser tamangba yimsü asenoki amadokra, asenok asoshi ibaji atakatem meshir asütsü. Tanü asenok tera tangar mesüka aliba ya asen tsüraburtemi Khristan yimsü agizüker, iba kasa temeimji tangar dang sayua Tsüngrem mapa inyakba tejang lir. Ajisüaka, asenoki asenoksasa nisung aküm ama bilema tangar tamangba yimsü agi aniba yimten nung shilem agira, asenok tamasaba tia dang nungi tamajungba tiai aitsü. Asenoki linük nung nashi metepsettsü aser nashi shi mayoktsü aser nashi shi bener mesenzütsü ta asüba ozüng anema nokdang dang, nashi shi chinüba agi masü saka temeten akaba senso aka ama tangar tamangba yimsü nem asenok malendaktsütsü asoshi arsangoktsür amai inyaktsüla aser tamangertem tasü ittdakja ajungshiteptsüla.