Nashi shi khenyongi meyokdaktsüner: VHP

Lucknow, Oct.11: Uttar Pradesh nung nisung kari nashi shi achir ka züksetba sülen tanü Deobar nü Vishwa Hindu Parishad (VHP) lenir kati ashiba agi, India nung nütsüng yongsük asemsü nung anasübo shi achirtem lir, anungji linük nung nübortem chia ajemba yimya balaka melenshitsünüa mali saka nashi shibo khenyongi mechidaktsüner.
“Onoki aginübaji nashi shi ya khenyongi nokdangner, kechiyong Hindu nungertem asoshi nashi tetsü ya tamang tamendakdak lir, anungji ibaji meyirutsütsüla,” ta VHP nung repsem tongti zülur Surendra Jain-i metetdaktsü.
VHP mesüra Sangh Pariwar teloki nübortem achiajem yimya melenshitsütsü makok saka nübortem nem nashi shi mechidaktsüner, ta VHP lenirisa metetdaktsü.
Linük nung tesem kar nung nashi shi machitsü nokdangba ajanga timtem adokba anema nisung kari ‘award’ meyipa agütsüba indang ken o dena shisemtsü merangdang, parnok jagi Saudi Arabia-i orr yangji ak shi achitsü sentong lir ta sangdongtettsü asü ta VHP lenirisa asüngdang. Item jagi Saudi Arabia nung ak shi achitsü yimjak nung sangdongba sülen parnokji taküm tajung meyipa arura, nia parnokji pelashishia agizüktsü, yamaji ka meinyaktetra, parnok ama nisung jagi anemsü mapa meinyaktsüla ta Jain-isa metetdaktsü.
Cabinet minister Mohd Azam Khan-i UN dangi nashi shi machitsü nokdangba atema ken o benoka shidi züluogo ta angazüka osang ka aija ashidang, ibaji nüngdak makaba mapa ka inyakogo ta VHP lenirisa aitsü. Atangji, sorkar sangdong nung nashi shi ta mali saka nokdanga aliba shi ta dang shia lir, anungji idakji san aser nabong shibo mali ta paisa metetdaktsü.
VHP lenirisa UP chief minister Akhilesh-i aniba sorkar aija ashidang, state sorkari pei yarinütsü dang shimteta yaria yimsü asür, kechiyong kin ka nungi adokba sensaker nisung ka nembo sen lakh 45 den mapa agütsü saka ano tanga kin ka nungi (asür) sub-inspector Manoj Misra tepsetba mapa nungbo teyari kecha magütsüi lir VHP lenirisa metetdaktsü.