Nashi shi mechidaktsüner

India nung BJP teloki yimsü asüba state-tem nung nashi shi mayoktsü aser nashi shibelen masütsü ozüng agütsübaji parnok asoshibo tim dang saka nashi shi achirtem asoshibo timtem aser takoksa tulu ajurudagi. Hindu nungertemi nashi ya tsüngrem amato külemer, anungji nashi tepsetbaji tsüngrem tepsetba den kasa aser nashi shi achirtemji khenyongi tsüngrem metsübur amai parnokibo bilema alitsü südi. Ibaji meteta nashi shi achirtemia parnok akümtsübua nashi alepba aser nashi shi ayokba aser achiba yimyatem tazüokba nung amshitsübaji kanga tongtibang asütsü. Ajisüaka, India ama ka tamangba yimsü, kin kidong aser oshi zünger mezüngma aliba lima ka nung government-i chiyongtsü achiba tashi nung ozüng zünga yutsüra, ibaji India tilaba akümtsüsa inyak tenzükba mapa ka asütsü. Iba ama sentong aser ozüng jagi India telongjem raksatsü. Nashi shi ya shi rongnung tajung ka, temang atemabo ak shi dang nungia tajungba, anungji nübortemi kanga sapua achir. Ibayongji, alima nung tajangzük keta shishilembatetba shi rongnung nashi shi ya lir. Aji oda, nashi shi achirtem tiaji yutsür nashi shi ayokba agi kibong mesüa alir nisung aika lir. Ajisüaka, nashi shi mayoktsü aser shimebelentsü asoshi ozüng agütsü nungji nashi lepa shi ayoker dang masü saka nashi shishilembar aika mapa maka kümogo. Aji oda, ozüng aküm nungji, joko nashi shi ayoker aser nashi shibelenertem mita nokdangtsü asoshi telok shimteta yuja lir aser item jagi lenmang tashi nung mita atar. Tanü India nung India senso süaka nüchiso maka shi tashi government-i melaba shi dang achitsübaji timtem tulu lir. Atangji, Nagaland ama state nungbo nashi shi achir teimba aser government-a BJP government masü, anungji nashi shi machitsübabo ozüng agüja mali, ajisüaka Nagaland-i nashi bener arutsü lenmang mesüa akümtsü. Naga nunger nashi shi achir tia ajung, tang tashibo Assam nung BJP-i aniba government liaka ano nashi shi mayoktsü tashibo ozüng agüja mali. Ajisüaka, tawato Jorhat tashi nunga nashi meiner oa alirtem merenshiba otsü asenoki angashiogo. Aji oda, Assam nunga nashi maleptsü aser nashi shi shimebelentsü ta lemtet nungbo Nagaland nung nashi shi angutsü tasak asütsü. Aji oda, tangbo Assam nung BJP kijai government mekümtetba agi tanga state nung latetba amabo melatetter asütsü, kechiyong tanga state-tem o North east nung aliba state-tem na libaliro ya balala, ajisüaka BJP mulungjang nung nashishi indang jembiba ya Northeast state-tem nunga latettsü temulungtetba alinung, parnok asoshibo tasakbo masütsü. Tang ya BJP government taginübaji kin ka, anungji sen tapu ka dang ta asüba amato, India ya kin ka anungji ozüng ka, kin ka anungji tamangba yimsü ka aser kin ka anungji saru saruba a kasa tapu ka dang India ajunga sarutsü tebilemba, tangatetba aser temulungtetba lir. Aji junger amato saka India ama ka nungbo senso ajak tamangba yimsü ka, ozüng ka aser saru ka kübok alitsübaji mapa tasak aser timtem aika lir. Atangji, India nung nashi melepdaktsütsü tebilembaji akhidang nungi Hindu nunger tebilemba liasü. Iba jagiang tang dang masü saka center governmenti akhidanga merangdangogo. Aji oda, nashi kümzüka ayutsübaji linük temzüng tashi nung zülusema lir. Iba jagiang, tamasayongi Naga nungertemi India yimten kübok masü saka balaka aliang tajungba ta angatet aser yimten nüchiso atema nokdak. Tamalen nungi Naga nunger yimten lenirtem tangatetbaji Naga nungerji India nunger masü, kechiyong Naga nungertem ya Hindu nunger masü, Naga nungertemi nashi shi achir aser Hindu nungertemi nashi külemer, Naga nunger o Hindu nunger na sobaliba balala. Ajisüaka, India-i Naga nunger yimten balaka meyoknü, anungji mekümnüseti tanübo Naga nunger India nunger kümer lir, anungji Naga nunger asoshi Nagaland tilaka ya dang masü saka India ajunga ya Naga nunger lima asütsüla kechiyong Naga nungertemji India nunger. Ajisüaka, India nung Naga nungertemi achiba chiyongtsü mechitettsüsa aser Naga nungertemi amangba yimsü sadema mamangtettsüsa kümadokba tensa mapang ya Naga nunger asoshi tebilemdangtsü aser pei temeten asoshi tasü itta nokdakba mapang ka asütsüla. Iba olaji Nagaland Legislative Assembly nung, Lok Sabha nung aser Rajya Sabha nung chichiba Naga nunger meimer Naga nunger lira angashidaktsütsüla.