Nashi temulungjang shilem tila ka agi tantsür ka kümzük

Chennai, July 16 (Agencies): India nunger doctor temi arishi küm 81 tain tantsür ka meyong temulungjang tapok aliba nung nashi temulungjang nungi shilem tila ka (valve) inokja nembangtsüba ajanga la taküm kümzük.
Iba operation ya Honibar nü Frontier Lifeline Hospitals, Chennai nung doctor pezüi ghonda asem agia tembanga liasü.
Doctor temi ashiba agi, iba Hyderabad tsürla ya küm 11 tejaklen iba kasa operation agia liasü. Ajisüaka lia-lia iba nembangbaji tilaba akümba ajanga temulungjang tashidak meyipa aru.
Frontier Lifeline Hospital nung aliba doctor temi la temulungjang jenjang jungjunga tendanger ang iba operation ya agia liasü.
La operation agitsüji melara masü asü, kechiba süra küm ishika tejakdang la mama cancer atema treatment tulu agir liasü.
“La radiotherapy agiba ajanga teku nung aliba tissue tem mateper liasü. Ibaji ajanga tan operation agitsüba ya kanga tasak aser lendong keta liasü,” ta iba operation agitsüsang aser senior consultant cardiologist, Dr Anantharaman-i ashiba English daily osang kaket ajanga metetdaktsü.
Iba tantsür ya tang kanga junga kümdar aser joko general ward kati belener aruogo.