Nashi tepsetba atema Centre-i ozüng ka latettsüla: Azam

Mathura, October 30 (Agencies): Uttar Pradesh Minister, Azam Khan-i, nashi aser kisetshiruru onük nung nüburtemi mangatettep adoktsüsa o jembiba nokdangtsü atema Centre-i ozüng latettsüla, ta takhangba ka agütsüogo.

Yashi Khan-i shidi ka ajanga Govardhan Peeth Swami Adhokshjanand Maharaj nung Shankaracharya dang, pa mamatzü ajemtsü atema nashi ka agütsüba atema pelaba shisemba den külemi nashi tepsetba dak sentakba ozüng ka latettsü atema Ato kilonser Narendra Modi den jembidaktsüner ta mepishiogo.

Hindu seer, Shankaracharya-i Khan nem nashi tanak ka sempet agüja liasü.

“Nashi ya mangatettep onük mesüra o toktepba onük ka mekümdaktsütsüla. Nashi shi aser tanga shirurutem onük nung mangatettep adoktsüsa nüburtemi jembiba nokdangtsü atema Centre-i ozüng tasen ka latettsüla,” ta Azam-i ashi.

Kibur maliba nashi tem jenoktsü atema tejenoktak ki yanglutsü aser shiruru tasü shi ayokba nokdangtsü atema Centre sorkari inyaktsüla, ta Uttar Pradesh Minister of Minority Welfare & Urban Development, Azam-i ashi.

“Taküm aliba shiruru kaji asenok tamang yimsü den sentaktepa lira, parnok asüpila sentongji-a kasa yimya nung agitsüla. Nai meimba shiruru ka mayoktsüla,” ta paisa ashi.

“Iba ya mangatettep adokba onük ka mekümdaktsütsüla aser lokti nung temeim aser yimjiyimjung alitsü atema Ato kilonseri nendaka inyaktsüla,” ta paisa shisem.