Nashi tepsetba nokdangba ajanga NE bo mekongshitsü südi

Imphal, May 28 (Agencies): Taoba Hokolbarnü Centre sorkari nashi tepsetba dak sendakba ozüngtem agi Northeast state tembo mekongshitsü mesüra kangabo mekongshitsü südi, ta NE tesem nung aliba nüburtemi bilemer.
Centre nung aliba BJP-i aniba NDA sorkari nashi, jang aser ut densema shirurutem tepsettsü atema shiruru ayokba markets nungi shiruru alizükba anema ozüngtem sangdongogo.
Item ozüng dak sendakba nung advocate aser taoba mapang Manipur nung Additional Director General of Police, A. Romenkumar-i, nashi aser jang tepsettsü nokdangba anema nokdakertemi linük Temzüng kübok Arrla 21 nung chiyungtsü temeten agüja aliba onük nung ajemdaker raratettsü, ta ashi.
“Ajisüaka taküm alitsü atema temeten indanga temzüng nung shia lir,” ta paisa ashi.
2014 küm ken o ka nung Supreme Court-i, linük temzüng kübok Arrla 21 nung shia aliba ‘taküm’ tetezü nungji taküm aliba shiruru ajak densema lir, ta obendang agüja liasü.
Taoba mapang minister aser 2016 küm March ita assembly election nung BJP ticket nungi tamakok angusang, Nimaichand Luwang-i, “Nokdangba ozüngji shi achirtem- Khristantem, Muslim tem aser tangartem aliba state, Manipur nungbo kodanga mebenoktettsü. State nung Vaishnavite Hindu nunger nütsüngji ishika dang lir. Iba telemtetba ajanga BJP-i takoksa angutsü,” ta ashi.
Churachandpur district nung nashi tepseta shi ayoker ka tenüng agi, L Haokip-i, “Ozü otsüla-oboula nungertem shikarirtem liasü aser onoki benjung balala ajak nung nashi aser jang tepseta shi ayoker. Item ozüng tasentemji mangateter,” ta ashi.
Manipur nung tribal markets ajak nung nashishi aser mesü shi densema tanga shi balala ayoker, iba nungji tangalen nungi tsüngküm mapang balala nung aruba ozütem dena lir. Arem shiruru tapu balala ajak shi ayoker. Iba denji kasa Mizoram, Meghalaya aser Nagaland state tem nunga shi ayoker.