Nashi tepsetba olulu ajanga mepetmesü adok; nisung 21 puogo

Mainpuri (Uttar Pradesh), October 10 (Agencies): Mainpuri nung nashi tepset ta kari olulu prokba ajanga mepetmesü adoka lungkak aitertemi police garitem aser dokan tem nung mi senoktsüba den külemi police tenet yirutsüogo.
Brihostibar-Hokolbar nü rara adokba dak sentakba nung nisung 21 puogo aser pei mapa nung tamakok aludaktsüba ajanga circle officer mapa nungi anentsüogo.
Jila nung tamangba yimsü ana nüburtem tsüngda rara adokdaktsütsü nükjidong nung Karhal tesem nung nashi tepset, ta nisung kari olulu proka liasü, ta Hokolbar nü ketdanger otongdar kati ashi. Ajisüaka post-mortem osang ajangabo iba nashiji tashitak ka ajanga asü ta shiogo, ta paisa ashi.
“Nashi asüba sülen teküp agizükertem aser lenmang nung rara adokdaktsürtem naprong puogo. Nashi teküp agizüker nisung ana densema nisung 21 puogo,” ta pai ashi.
Police-i parnok apuba sülen lokti jagi police garitem nung mi senoktsü, iba den külemi dokan nunga mi senoktsü,” ta District Magistrate-i ashi.