Nashi tepsetertem alensettsü : Chattisgarh CM

Raipur, April 1 (Agencies) : India nung nashi kümzüka ayutsü atema takhangba balala agüja ola adokba mapang ka nung, Chhattisgarh Chief Minister Raman Singh-i Honibarnü nashi tepsetertem süngzü agi alensettsü ta metetdaktsüogo.
Tesüiba küm 15 tashi BJP-i state nung sorkar ketdangsüa arudang nashi tepsetba tatalokba ka dang mali, ta Raman Singh-isa ashi.
“Tesüiba küm 15 tashi Chhattisgarh nung nashi tepsetba tatalokba ka danga mali. Nisung kari nashi tepsetra, süngzü agi alensetang” ta paisa shisem.
Hokolbarnü Gujurat nung Bharatiya Janata Party (BJP) sorkari nashi tepsetertem atema ozüng tesashi ka yangluogo aser ibaji taküm piyong tepuokdak ayutsü atema lir.
State Assembly-i Gujarat Animal Preservation Act of 1954 yanglushi aser iba nung aibelenertem taküm piyong tepuokdak ayutsüba aser sen lakh 5 senchi achiba enoksemogo.
Gujurat nung nisung kar ket nungdanga nashishi bena aliba putetra, pa/la küm 7 nungi 10 tashi tepuokdak ayutsü.
Ozüng yanglushiba ajanga Gujurat nung nashi tepsetbaji bail nung magizüktetba ken o ka kümogo.
2011 nungi Gujarat nung nashi tepsetba, nashi belenba aser nashishi ayokba nokdanga liasü.
Honibarnü AIMIM tanishir, Asaduddin Owaisi-i BJP luja, Uttar Pradesh nung nashiji tetsü lir saka northeast nungbo chiyungtsü lir ta shiogo.
“BJP-i Uttar Pradesh nungbo nashiji ‘mummy’ ta züngshir saka Northeast nungbo ‘yummy’ lir. Iba ajanga BJP-i anemsü agi mapa inyakba sayur” ta Owaisi-i ashi.
UP Chief Minister, Yogi Adityanath-i UP nung shiruru tepsetba tesemtem shibangtsüba anema Owaisi-i iba olen jembi.
Northeast kübok Arunachal Pradesh, Mizoram, Meghalaya, Nagaland, Tripura aser Sikkim state tembo nashi tepsetba menokdanger.