Nashi tepsettsü nokdangba ya Sangh Parivar asalentong lir: CPI

Thiruvananthapuram, May 28 (Agencies): Tanü CPI-i, Centre-i nashi tepsetba nokdangtsü atema metetdaktsüba ya Sangh Parivar-i India linük ya ‘Hindu linük’ ka kümdaktsütsü atema merangba shilem ka lir, ta aitsü.
Kerala yimtiba, Thiruvananthapuram nung osangbenertem den jembidang CPI General Secretary, S Sudhakar Reddy-i, “Sangh Parivar-i ajak nem kangshia süngolemba dang chidaktsütsü meranger. Iba ya parnok indang ‘Hindu linük’ asalentong shilem ka lir,” ta metetdaktsü.
Iba ya shisa makaba telemtetba ka lir aser party-i ibaji aitsür, ta shia Reddy-i, iba telemtetba anema longkak aittsü atema May 31, 2017 nü CPI secretariat nung o lemteptsü, ta metetdaktsü.
“Sangh Parivar-i sempaba telok kar- Muslims aser Dalit nunger anema Centre sorkari iba telemtetba agi,” ta paisa aitsü.
Parivar-i lokti ya BJP tangatetba nung anidakdaktsütsü meranger, ta shia pai, nüburtemi kechi azüngtsüla, kechi sobutsüla, kechi jembitsüla aser kechi achitsüla? Ibaji RSS headquarters nung telemtetba agir, ta ashi.
Nüburtemi iba ya magizüktettsüla, anungji item anema meyiper nokdaktsüla, ta paisa ashi.
India linük nung nütsüng shilem aikati kisetshiruru tepseta achir, aser Kerala nunga nütsüng shilem 90 shii shi achir; Tanga state kar nung nütsüng shilem 60-70-i shi achir, ta Reddy-i metetdaktsü.
Sorkari iba telemtetba agiba ajanga tanga linüktem dangi shi yokba nung timtem adokba dang masü saka rongsenkettsüng- mamatzü aser shiküp industry tema kongshitsü, koba ajanga aluyimertem timtemtsü, ta pai ashi.
Asen Ato kilonser, Modi-i aniba küm asem sorkar ya takoksatsü ka liasü, ta shia pai, “Asen exports, manufacturing aser mining sector tem timtem tulu nung lir,” ta ashi.
Linük kübok Kerala, Karnataka, Tamil Nadu, Andhra Pradesh aser Telangana state tem nung tzünglu junga maruba ajanga aluyimertem timtemer, ajisüaka sorkari nüburtem nem teyari kecha magütsü, ta paisa ashi.
Modi yimsüsüba kübok Centre-State tesendaktep mejungi kümogo, ta paisa shisem.