Nashi ya ‘National Animal’ ta sangdongtsüla: Rajasthan HC

New Delhi, May 31 (Agencies): India linük tesem ajaklen nashi tepsetba aser nashi shi achiba onük nung o toktepba mapang ka nung tanü Bodhbarnü Rajasthan High Court-i Centre dang, nashi ya ‘Linük shiruru’ ta sangdongtsüla aser nashi tepsetertem akumli piyong tepuokdaki yoktsüla, ta takhangba agütsüogo.
Single-judge bench, Justice Mahesh Chand Sharma-i, state chief secretary aser advocate general na ketdangsüba kübok nashitem kümzüka ayutsüla, ta metetdaktsü.
“Nepal ya Hindu linük ka lir aser parnoki nashiji linük shiruru ta sangdongogo. India ya shiruru mesüba nung ajemdaker aluyimba linük ka lir. Arrla 48 aser 51A (g) nung ajemdaker, iba linük nung nashitem kümzüka ayutsü atema state sorkar temi inyaktsüla,” ta pai HC tetuyuba nungji shia lir.
Linük temzüng Arrla 48 nung, State-i shirurutem rendakja kümzüka ayutsü aser nashi tepsetba nokdangtsü atema shia lir aser Arrla 51A(g) ajanga alima kümzüka ayutsü aser taküm shirurutem meimtsü indang shia lir, ta paisa ashi.
“Sorkari nashi ya linük shiruru ta sangdongtsü imlar, aser nashi kümzüka ayutsü atema state nung Chief Secretary aser Advocate General na nem mapa lemzüktsütsüla,” ta shidi tapak 145 tetuyuba nungji pai shia lir.
Court-i Hingonia Gaushala onük angadangba mapang iba tetuyubaji agütsü. Yaküm Jaipur nung sorkar indang nashiki ka nungi nashi 500 dak tema samaa liasü.
Centre sorkari nashi tepsetba nokdangtsü tetuyuba mapa küma inyaktsü atema Madras High Court-i hopta pezü mapang atsülangba osang sangdongba sülen tanü Rajasthan HC-i iba tetuyuba metetdaktsüogo.
Yashi High Court Madurai bench-i iba onük nung state sorkar aser India sorkar naprong dang nungi telangzüba meshiogo.
Ano külen tanga osang ka ajanga ashiba agi, nashi tepsettsü nokdangba anema ozüng nung ajemdaker ken o benoktsü asoshi Kerala sorkari Brihostibarnü cabinet senden ka ayongzükogo.
Karnataka aser Kerala sorkar tsüngsü nung anidaka Tripura sorkaria, parnoki Centre tetuyuba sülen manidaktsü ta sangdongogo.
Centre teteyuba anema yashi Karnataka chief minister, K Siddaramaiah-i, Centre nungi tetuyuba ajakji angatsü menüngdak, ta shiogo.