Nashi ya shinga tetsü ka masü, iba ya shiruru ka dang: Katju

Varanasi, October 05 (Agencies): Tawa Delhi anasa nisung kati nashi shi achi ta tai tonglokja olulu prokba sülen loktii pa tepsetba dak sentakba nung taoba mapang Supreme Court judge, Markande Katju-i, nashi ya tanga shiruru ama shiruru ka dang lir, “iba ya nisung shianga tetsü ka masü,” ta ashi.

Banaras Hindu University nung sentong ka nung jembidang Katju-i, “Nashi ya tanga shiruru ama shiruru ka dang lir, aser nisung shianga tetsü ka mesütettsü. Ni nashi shi chinüra iba nungji kechi tai ali, alima ajungalen nisungtemi ashi shi achir, ni-a chinüra shibai ni nokdangtettsü,” ta ashi.

Katju-i ashiba agi, pai-a nashi shi achir aser iba nungji kecha tai mali.

“Alima nung nashi shi achirtemji majung asü, aser asenok (linük nung) machirtem dang temeshi nisungtem asü, nisungtemi nashi shi achiba nung kechi tai ali, ni-a achir aser maneni achitsü,” ta paisa ashi.

Taoba mapang Allahabad High Court judge, Katju-i tawa Dadri nung tebur ka tepsetbaji sashia aitsüba den külemi aibelenertem nem temerenshi tulu agütsütsüla, ta shiogo.

“Ni-a media aser tangartem dang nungi angazükba agi, tebur kati nashi shi achi ta tekülem ki (Hindu) ka nung sangdong ka agütsü, iba sülen lokti jagi nisungbaji tepset,” ta ashi.

“Ano tamajungtibaji, iba tebursangji tanga kuli ajanga masü sala olulu nung ajemdaker tepset. Tekaratiba nung aibelenertem nemji temerenshi tulu agütsütsüla,” ta pai osangbenertem dang ashi.

Katju-i jembiba o ji ashishia tesülen kaketshir aikati lungkak aita pa anema yimyim ayima liasü, parnokisa Katju lenmang nokdangtsü merang saka security guard temi pa meiner ao.

Tawa tekülem ki ka nung sangdong ka ajanga, Mohammad Iqlakh-i nashi shi achi ta tai tongloktsüba sülen lokti kati pa par kidang nungi anizük aser yimtsüng lenmang nung lung agi onset.