Nashishi nokdangba sülen momo nokdangner

New Delhi, June 8 (Agencies): Nashishi nokdangba sülen Jammu and Kashmir BJP legislator Ramesh Arora-i ‘momo’ nung carcinogenic monosodium glutamate mesera Ajinomoto keta lir koba temang atema majung, ta shia ‘momo’ ayokba nokdangner.
India nung nashi tepseta ayokba aser shishilembaba nokdangba ken o talisa northeast state tem nung mesüngjemteti aliba mapang ka nung, obendanger ka aser BJP legislator, Ramesh Aroro-i ‘momo’ nokdangtsü asoshi benokba ya iba tesem nungi kanga mejungi aitsütsü, kechiyong iba chiyongtsü ya northeast nung kanga sapua achir aser chiyongtsü tongtibang ka lir.
Legislative council nung züngsem yagi lenti nung jenjang dalang agi anguba chiyongtsü ya nokdangtsü asoshi maparen balala inyakdar. Momo ya Nepal nungi yanglutet ta jembir aser iba chiyongtsü ya India nung kanga nüngtugu lir. Tawa sentong ka nung prime minister office nung junior minister Jitendra Singh, ‘momo’ kanga jangratema achiba nugogo.
“Momo ya tar cancer dena tashidak aika adokdaktsüba tera lir ta ngutetogo. Junk food tem ajanga asen chirnurtem dak kongshiogo. Iba dak sendakba nung nüburtem ajungmesotsü nüngdaker,” ta Arora-i Bodhbarnü ashi. Pai taoba ita pongu tashi lokti senden balala nung jembidang momo ayokba par state nung danga nokdangtsüba jembia arudar.
Pai momo yanglua ayokba aser achiba kicha anemer masü saka China nunger chiyongtsütem Ajinomoto inoka yanglubatem ajak anemer. “Ajinomoto ya metsü tapu ka lir aser iba ajanga cancer den tanga tashidak aika adokdaktsür. Iba ajanga tekolak menüba ka migraine kümdaktsür,” ta paisa ashi.
Pai tawa momo aser lenti nung ayokba China nunger chiyongtsütem nokdangtsü asoshi health minister Bali Bhagat den ajuruteba pa ajungshia liasü. Ajisüaka merekmereka amshiba aser temang nung timtem madokdaktsüba chiyongtsütem anema nokdaker masü, ta paisa ashi.
Netaji Subhas Chandra Bose Cancer Research Institute-i 2007 küm bushisüngdangba sülen Ajinomoto ajanga tepok nung cancer adoker ta metetdaktsü. WHO-ia iba chiyongtsü ya temang atema majung ta 2004 küm sangdong. Ajisüaka Ajinomoto kanga bulua amshiba linük 26 nungi 8-i dang iba ya nokdanga lir. US Food and Drug Administration-i ashiba agi, ‘monosodium glutamate’ achiba nung timtem mali ta metetdaktsü.