National aser state Highways nung yi mayoktsüla: SC

New Delhi, April 01 (Agencies): April 1, 2017 nü nungi tenzüka Supreme Court (SC)-i National aser State highways nungi metre 500 telongtet nung yi ayokba dokantem nokdangogo, iba den külemi highways nung aliba hotel aser restaurants nunga yi magutsütsü tuyuogo.
Ajisüaka highways nung aliba municipal area tila aser nütsüng 20,000 den ishiba aliba jila tilatem nungbo highways nungi metre 220 telongtet adenerbo yi ayoktsü melar.
Yaküm December ita nung SC-i iba tetuyuba agutsüba sülen linük tesem balala nungi yi ayoker 75 shii Supreme Court dang temepishiba shidi ajanga, ibaji ajanga parnok takoksa anguba dang masü saka state temi saru nung takoksa angutsü, ta shia liasü.
Highways nung aliba yi dokantem aienshitsü atema SC-i March 31 nü tashi anogo züngzükja liasü, ajisüaka Telangana aser Andhra Pradesh na nungbo September 30 aser June 30 tashi anogo atsülangtsüogo.