National Award anguba ajanga tali meranga inyaktsü asoshi ajungshir: Sonam

Mumbai, April 8 (Agencies): Sonam Kapoor ya ajaki ‘fashionista’ ta züngshia arudar. Tawa lai shilem agiba ‘Neerja’ film National Award ngua liasü, aser lai ashiba agi, iba tetushi award ajanga la mapa nung tali temerangba inyaktsü asoshi ajungshir.
Ram Madhvani-i direct asüba movie ‘Neerja’ nung Sonam-i ‘Neerja Bhanot’ shilem kanga junga agiba atema 64th National Film Awards nung ajaki tenüng sanga liasü.
“Nü mapa asoshi ajaki tenüngsanga agizükra tali meranga inyaktsüla. Ni dang Neerja film yangluba tesem, Maheshwar nung ‘Padman’ film atema Akshay Kumar den külemi teinyakdak lir,” ta Sonam-i ashi.
National Award nung Akshay-ia best actor award ngua liasü.
National Award mangu tsüngda Neerja film nung shilem agiba atema Sonam-i award aika ngua liasü, saka lai iba award ya tongtibangba ta züngshir.
“Kü asoshi National Award ya kanga tongtibang lir, kechiyong iba ya ‘special jury award’ ka lir. Iba ya kü asoshi kangasa tongtibang lir kechiyong iba award angutsü asoshi imlaa meliasü. Kü dang nungi tali ozü kinungertem aser kü tsürapur tepelaba lir,” ta lai ashi.
Lai director Ram Madhvani aser ‘Neerja’ film nung shilem agir ajak dang pelaba lemsatepa liasü.
National Award sentong nung ‘Neerja’-i best film award ngua liasü.