National Award ya ni atemabo Oscar angur amai: Ritika

March 28, 2016 : Tsüngteper liasüba actress akümla Ritika Singh nem Special Mention category tarensen nung National Award agütsütsü shimtetogo. Iba sempet ya Tamil sports drama film ‘Irudhi Suttru’ nung lai shilem kanga junga agitetba ajanga angurba lir.
Sudha Kongara-i direct asüba film nung Ritika den R Madhavan-a shilem agia lir.
“Ni kechiang mashir. Ya ni asoshibo Oscar angur amai. Iba award asoshi ni Irudhi Suttru film nung inyakertem aser shilem agirtem ajak den pelaba lemsateper. Mezüng shilem agiba film ajanga iba ama akhümket sempet anguba ya ni jenjang kanga tulu ka ngutet amai bilemer aser iba sempet ya ajanga ni ano tali meranga inyaktsü ajungmesor,” ta Ritika-i IANS dang ashi.
‘Irudhi Suttru’ film nung ango apur tetsür ka maongka tajung ngua tesüiba mapang tsüngteper rongnung takok ngua alir kati tsüngteptsü sayur. Iba tetsür shilemji Ritika-i agi aser tsüngtepsang shilemji R Madhavan-i agia lir.
“Film director Sudha aser Madhavan na tenüng kangasa asanger. Tenati kü dak temulung lemteta ni meyari asübo iba takok ya mongula,” ta lai ashi.
Ritika ya tang Vijay Sethupathi den Tamil film ‘Aaandavan Kattalai’ tetangokdak lir.