National awards for Bravery atema tanurtem tenüng meshir

Kohima, July 07 (TYO): Tasütait mapa inyakba atema tanurtem nem National Awards for Bravery agütsütsü asoshi tanurtem tenüng meshir; iba nükjdong ya tasütait tanurtem nem tapet tetushi agütsüba ajanga tanüngba tanurtema ajungmesotsü atema lir, ta ketdangsertem sangdong ka nung metetdaktsü.
“Tasütait mapaji taküm aotsüsa lendong mesüra timtem ajurutsü tensa nung tasütait mapa inyakba, mesüra tasütait tanela sayuba aser ozüng alema inyakba anema tasütait mapa inyakba asütsüla,” ta kasa osang ajanga ashi.
Nominations ji State/U.T. Councils of ICCW den state aser Union Territory ajak nungi Director Generals aser Commissioners of Police densema state sorkar kübok department balala nungi yoktsüla.
Tasütait mapa inyaker tanursangji iba tatalokba mapang nungji arishi küm 6 tekübok masütsüla aser arishi küm 18 dak tema masütsüla.
Iba application ji teküboklen aliba anatibosa recommend asütsüla:
1. Tanursang azüngba school Principal/Headmaster mesüra Panchayat/Zila Parishad tongti.
2. State Council for Child Welfare nung General Secretary mesüra President.
3. Collector/DM/Sorkar ketdangser.
4. Iba tesem nung aliba Supdt. of Police mesüra temaba Police Ketdanger.
2017 küm iba National Awards atema tatalokbatemji July 1, 2016 aser June 30, 2017 tsüngda atalokba asütsüla. Temsüa dang lira Selection Committee-i parnok tashi amshia July 1, 2016 jakdang ita asem nung atalokba-a agizüktsüa akok.
Tenüng agütsütsü atema tatembangbuba anogoji 2017 September 30 nü asütsü, ta ketdangser osang ajangasa metetdaktsü.