National Championship: India’er toktepa jajartemi otsü tasen yanglur

Jaipur, February 27 (Agencies): India kübok Jaipur nung tanü, Honibar nü agiba National Champoinships mezüngbuba anogo nung Uttarkhand nunger toktepa jajar, Gurmeet Singh-i tekaratiba mapang nung alizüng tonga mezüngbuba jenjang nguogo.
Tanü agiba tetoktepa nung India nunger toktepa jajar asayar 7 tashi Rio Olympics nung shilem agitsü temeten angutsü asoshi latettsüba mapang, ghonda 1 ser minute 24 den tekaraba mapang nung alizüng tonga otsü tasen yanglua liasü.
Grumeet-i tanü mapang 1:21:24.57 nung alizüng mezüng tonga gold agizük aser Tamil Nadu nunger K Ganapathi aser Haryana nunger Sandeep Kumar nati mapang 1:21:51.43 aser 1:21:56.81 na nung alizüng tonga silver aser bronze medal agizük.
Par asem sülen anidaka, National otsü abensang, Kerala nunger K T Irfan-i mapang 1:22:14.02; Uttarakhand nunger Manish Singh-i mapang 1:22:18.89, Haryana nunger Devender Singh-i 1:22:40.60 aser Harayana nungersa, Neeraj-i mapang 1:23:34.02 nung alizüng tonga Rio Olympics nung shilem agitsü temeten asoshi latettsüba mapang ajangateta liasü.
Tanü tashi nung India nung toktepa jajar tebur asayar 9 tashi Rio Olympics tebur 50km walk tetoktepba nung shilem agitsü jenjang ngua lir aser parnok rong nung Manish aser Sandeep natibo tebur 20km walk tetoktepba nunga shilem agitsü jenjang anguba osang jangjaogo.
Ajisüaka, tebur walk tetoktepba shilem shia nung linük shia nungi asayar 3-i dang shilem agidaktsütsü lateta aliba yong parnok 9 rong nung nisung 3-i dang Rio Olympics nung toktepa shilem agitettsü.
Athletics Federation of India (AFI)-i tarutsü mapang nung asayar 3-ji shima Rio Olympics-i yoktsü renemogo.
Ano külen, Punjab tsür, Khushbir Kaur-i mapang 1:34:52.70 nung tetsür 20km walk alizüng mezüng tonga gold agizükba osang jangjaogo.
Jaipur tsür, Sapna aser Uttar Pradesh tsür, Priyanka natia mapang 1:36:59.36 aser 1:40:58.93 na nung alizüng tonga silver aser bronze medal agizüka liasü.
Tetsür 20km walk tetoktepba shilem nung Khushbir aser Sapna nati Rio Olympics nung shilem agitsü jenjang yaküm, 2015 küm ajangzüka liasü saka tanü tetoktepba nungbo tanünga tetsür toktepa jajartemi Olympics nung shilem agitsü jenjang monguteti süidaktsüogo.
Tetsür 20km walk tetoktepba nung shilem agitsü jangrartemi tajemba agi mapang 1:36.00 nung alizüng atongtsü asoshi Olympics ketdangsertemi latetja lir.