National Chess c’ship nung Naga nunger asemi shilem agitsü

Kohima, Luchii/December 3 (TYO): Nagaland nungi Chess asayar asem tanü Kohima nungi National Chess Championship nung shilem agitsü ogo. Iba asayamung ya jammu nung Luchii/Dec 8 nungi 18 tashi asayatsü.
Iba asayamung ya All India Chess Federation kübok Jammu and Kashmir State Chess Association-i ayongzükogo.
Nagaland nungi asayar asem ya, Kevilekho Zumu, Seyiekhrietuo Mere aser Akhrietuo Keseyi lir. Parnok iba asayamung nung Indian Grand Masters aser International Masters tem den National Championship title atema asayatsü.
Kasa mapang nung Nagaland Chess Association tir aser Minister for Planning and Coordination and Land Revenue, Neiba Kronu-i state nungi asayar asemi iba asayamung nung kanga junga shilem agitsü imlaa sarasademtsüba lemsatep. Kronu den Advisor for Food & Civil Supplies, LM & CP and NSDMA, Pukhayi Sumi aser State Bank of India, Main Branch Kohima puri senotsü teyari agüja asayar asem ya yokogo.