National Deworming Day tenzükogo

Dimapur, August 9 (TYO) : August 9, 2016 nü Ruzhukhrie Government Higher Secondary School nung National Deworming day (NDD) round tanabuba tenzükogo.
Iba sentong nung Mission Director NHM, Dr. Yankho Lotha-i o jembidang ashiba agi, National Deworming Day ya Ministry of Health & Family Welfare, Government of India ajanga ketdangsüa agir aser iba mapa ajanga arishi küm 1 nungi 19 tsüngda tanur nem tepok nung aliba mesen asütsü mozü chidaktsür.
February 2015 nung mezüngbuba NDD mapa küma tenzük aser ibaji state 11 nung takok ngua inyak. Iba mapang tanur million 89.8 deworming asü. World Health Organization (WHO)-i 2020 küm tashi nung tanur ajak deworming asütsü atema alizüng yua lir. Iba nung ajemdaker India sorkari National Deworming Day ajanga tanur noklang nung shilem 90 nem mesen tepsetba mozü agütsütsü atema alizüng yua lir, ta Dr. Yankho-isa ashi.
Nagaland nunga August 10, 2016 nungi NDD round tanabuba agitsü aser August 17 nü Mop-up day (MUD) agitsü. Iba mapang school aser anganwadi center ajak nung arishi küm 1 nungi 19 tsüngda tanur nem mesen tepsetba mozü agütsütsü, ta paisa shisem.
Sentong nung mendenji Director (Health) Health & Family Welfare liasü aser State Programme Officer (RCH), Dr. Bendangla Longkumer-i anküp tepela o jembi.