National Deworming Day Wokha nung amung

Dimapur, Tsüklai/February 12 (TYO): National Deworming Day, Wokha kübok school aser Anganwadi centre ajak nung February 8 nü kaogo. St. Peter’s School, Longsa nunga NDD sentong kaa liasü. Sentong nung Dr. Khokholie MO RBSK-i tanurtem mesen agi kangshiba agintsüji koda tongtibang iba indang jembia liasü. Iba sentong ya India sorkar, MoHFW-i achaayanga akar aser iba ajanga tanur arishi küm 1 nungi 19 tashi mesen agi infect asüba ajemdaktsütsü nükjidong yur inyaker.
Iba sentong akaba nükjidong tongtibangtibaji tanurtem health tajungba kümdaktsütsü asoshi parnok temang nung mesen tepsettsüba dak rangloker inyaker. Parasitic mesen (STH-Soil Transmitted Helminthes) ajanga tanurtem kanga bulua infect asür.
WHO ajanga ashiba agi, India nung tanur million 220 STH agi infect asütsü ana nung lir. Iba ya alima ajunga anung tebilemtsü tulu ka kümogo kechiyong iba mesen ajanga tanurtem anaemic, mal-nourished aser tashimait kümdaktsür aser parnok shiranga dang aliba den belema kümdaktsür aser mapa nung temulung agüja minyakteter. ICDS supervisors-i jila nung AWC ajak semdanga sentong balala asadangogo.
Iba sentong ya school aser AWC nung tanurtem ajak nem deworming treatment agütsütsü nükjidong nung ayongzük. Maneni iba anogo shirangba mesera marutetba ajanga madener tanurtem February 14 nü Moped- Up day nung temang anepalutsü, ta sorkar sangdong ka ajanga metetdaktsü.