National emergency sangdonga atsü yanglutsü ana nung lir:Trump

Washington, Tsükali/February 2 (Agencies): US tir Donald Trump-i ashiba agi, linük south tsütsü Mexico den arrtsü nung atsü yanglua ozüng alema bendanger senoka aitba nokdangtsü asoshi fund angizüktsü atem national emergency ka sangdongtsü ana nung lir.
National emergency benokba ajanga congress nungi temelaba magi-i Trump-i atsü yanglutettsü aser disaster relief fund amshitsü atema pa nem executive power agütsütsü.
Trump-i CBS News’ dang ashiba agi, border security dak sendakba nung opposition Democrats tem den dang sensaksema aliba ya mapang intokba maparen ka dang lir.
Paisa, US House of Representatives Speaker Nancy Pelosi aija ashiba agi, la masetshir aser lai politics tamajung benshir.
“La asentshitsü tasak ta bilemer, saka la ya linük asoshi tamajung ta nibo bilemer. Lai tenokdangba nüngdaker ta meteta lir aser asenoki border security nungdaker ta-a lai meteta lir. Lai arrtsü lapoka yuner südi mesera lai nisung shibelenba kecha auh ta mali südi,” ta pai Pelosi aija ashi.
Pelosi-i atsü yanglutsü anema nokdakba ajanga linük billion aika takoksa ajurur, ta Trump-i ashi.
“Lai linük asoshi mapang tamajung ka inyakdar,” ta Tir-i ashi.
Sensaksem ka nung pai ashiba agi, sorkar maparen shibanga ayuba sülen opposition Democrats pur den tenzükba sensaksem ya mapang indokba ka dang lir.
“Onoki national emergency ka benoktsü merangtsü kechiyong kecha mataloktsü amai ni bilemer. Democrats temi border security maginer südi. Parnoki atsü atsüba ajanga mapa takok mangutsü ta jembiba ni angazükdang parnoki iba atsü ya mapa küma inyaka otettsü ta meteta aliba ni jangjaa lir,” ta pai osangbenertem dang ashi.
Trump-i maneni pai atsü yanglutsü ta shia arudar kechiyong ozüng alema linüki senoka aitertem nokdangtsü lenmang ya dang lir.
“Iba ya inyaktsüsa akümtsü ta bilemer. Atsü ka kechisüdir süaka yanglutsü aser onoki tanga atsütem yanglushidar. Ajisüaka lenmang tanga nungiang ni iba mapa ya takaraba inyaktettsü,” ta tir-i ashi.
US leni nisung telok asem tashi arudar ta shia paisa, atsü ka ali nungbo iba ya kecha tebilemtsü makala, ta pai ashi.
“Ni Border Patrol aser law enforcement nem teyari agütsütsü asoshi military 2,500 yokogo. Military-i mapa tajung inyakogo aser iba nung atsü kar yanglushiba densema lir.
“Arrtsü kümzüka milera nisung shibelenertem nem lenmang sadema lapoka toktsür. Iba shishilembaba ya kar asoshi kanga tajangzük lir aser kar asoshibo kanga takoksa lir,” ta Trump-isa ashi.