National Herald ken o nung Rajya Sabha senden pezüben thinen

New Delhi, December 11 (Agencies): Hokolbar nüa Rajya Sabha nung Congress züngsemtemi lungkak aita yimyim ayimba den külemi, Ato kilonser Narendra Modi ya kijai tashi ambangyima amshir ka lir, ta ashi.

National Herald ken o nung Congress züngsemtemi senden nung Mendenbuba alidak anasai oa tanen makai yimyim ayimba ajanga nikongdang 2:30 ako tashi senden thinena liasü.

Anjongmeshi mapang tashi nung senden magitet aser Mendenbuba M. Hamid Ansari-i Question Hour junga agitettsü atema merang saka makok, iba yongji senden thinena liasü.

Tanü 11:00 ako nung senden tenzükba sülen Deputy Chairman PJ Kurien-i 11:30 ako tashi khen aser 12:00 ako tashi khen, ta senden thinena liasü.

Ano senden asentenshir tenzükdanga maneni Congress züngsemtemi lungkak aita Ato kilonser Narendra Modi ya kijai tashi amshir ka lir, ta yimyim ayima liasü.

“Iba ama ola ya ‘zoo’ nungang adoker,” ta Minister of State for Parliamentary Affairs Mukhtar Abbas Naqvi-i ashi.

“Mejashidaktsüner, züngsem kari ola tashii adoka ayimer, iba ya kanga tia maka. Onoki senden magiteter, tongtibang bill tem agizüktsü anünga lir. Nenoki pei teinyaktsü mapa nung tamakok angur,” ta Kurien-i shia senden thinen.

Ano Question Hour atema sentepdanga Congress züngsemtemi maneni lungkak aitba ajanga Ansari-i 12:30 ako mashi senden thinen.

Rajya Sabha senden ano asentenshir tenzük, saka kasa tatalokba ajanga nikongdang 2:30 tashi senden thinena liasü.