National Herald ken o nung Sonia o Rahul na nem bail agütsü, Congress teloki Narendra Modi aitsür

New Delhi, December 19 : National Herald ken o nung okadak nungi Congress tir Sonia Gandhi aser tadong tir Rahul Gandhi na bail anguba sülen Congress teloki meyiper Bharatiya Janata Party teloki aniba center sorkar dang ” tiyazü kuli” amshia opposition pur marishitsüla ta metetdaktsüogo.
Patiala House Court nung Metropolitan Magistrate Lovleen-i Sonia, Rahul, Motilal Vora, Oscar Fernandes aser Suman Dubey nungertem nem bail agütsüba sülen, Congress lenirtemi osangbenertem den jembidang, Prime Minister Narendra Modi anema jembi. Narendra Modi-i linük nung Congress samadaktsütsü merangbaji kodanga mataloktsü aser Congress teloki sensaker asoshi ochi atema maneni nokdaktsü ta Rahul Gandhi-i metetdaktsü.
National Herald ken o ya yimten tsütsü arishiba mapa ka dang lir, anungji okadak ken o kechi jembitsü ali aji jembiyonga aotsü ta Congress lenirisa metetdaktsü.
Kasa mapang Sonia-ia jembidang,” tanü senso kati inyaktsüba mapa amato okadak ozüng nung aliba ama anidaker. Ochibaji shitak adoktsü ta ni amanger ” ta laisa metetdaktsü.
Tang BJP teloki aniba sorkari opposition telok arishir aser government tenüng nung inyaker aika amshir. Ajisüaka, onoki itemji metsübur, onoki parnok anema raraba aser Congress sobaliba tajung asoshi nokdakba mapatem maneni inyaka aotsü ta laisa metetdaktsü.
National Herald ya Congress teloki adokba osangkaket ka liasü aser iba maparen dak akeba ken o nung yimten teloktem kanga sashia arrtepa aruba sülen okadak ken o angadang dangbo minute pongo magi aser Sonia o Rahul na prongla bail angu. Iba ken o dak sendakba nung okadak ken o agüja alirtem ajak nem bail agütsü saka Sam Pitroda nembo magütsü, kechiyong pa temang majungba agi marutet.
Iba kasa ken o nung Metropolitan Magistrate Lovleen-i bail agütsürtemji Congress lenir Motilal Vora, Oscar Fernandes aser Suman Dubey nungertem liasü.
Iba ken o ya okadak BJP lenir Subramanian Swamy-i agütsü aser pai obendanger dang tenaji linük adena bendangleni maotsü asoshi talenba ka alitsüla ta dena agütsü. Ajisüaka, obendangeri iba tashi inyaktsübajibo memulung aser ashi, “Sonia aser Rahul Gandhi na ajaki meteta aliba yimten nisung lir, anungji parnoki linük toktsür ajentsü ta shisaboluabo mebilemer.”
Sonia aser Rahul na nem kecha telatetba ka magütsüi bail agütsü aser tenaprongla dang personal bond sen Rs 50,000 ayutsü latettsü. Senior Congress lenir AK Antony-i Sonia atema kuli itsü aser Priyanka Gandhi Vadra-i Rahul atema itsü. Okadak obendangeri ano kasa ken o angadangtsü asoshi February 20, 2016 nikongdang 2:00 ako latettsüogo aser idangji Pitroda danga adentsü metetdaktsüogo.
Tanü okadak ken o angadang dang Congress Congress lenirtem aika adenshi aser iba jagi sepai 5000 tashi agi okadakji anüktsüsa aküm. Tanü okadaki arur Congrss lenirtemji taoba ato kilonser Manmohan Singh, Ghulam Nabu Azad, Mallikarjun Kharge, Shiela Dikshit, Kumari Selja, Ashwini Kumar, AK Antony, Meira Kumar ase Ambika Soni nungertem liasü.