National Register of Citizens (NRC) nung chichiba India sensotem kümzüka ayutsü

Guwahati, July (Agencies) : Supreme Court ketdangsüba nung National Register of Citizens (NRC) reprangshimba maparen nung chichiba India sensotem kümzüka ayutsü, ta Centre-i metetdaktsüogo.

“NRC nung chichiba India nunger ajak züluoktsü ta ni Assam nungertem dang nangzüker. India sensotem atema timtem kecha malitsü” ta Union Home Minister, Rajnath Singh-i ashi.

NRC indang mapa ya Supreme Court-i indangindanga repranger aser Centre sorkari kecha meshitettsü, ta paisa shisem.

Honibarnü Guwahati nung Union Home minister-i Northeast state 8 nungi chief minister tem den senden aliba sülen osangbenertem den sensaksemdang pai iba osang metetdaktsü.

NRC yanglushiba dak sendakba nung ken o kar adokra, ibaji Supreme Court-i dang bentettsü, ta Rajnath-isa ashi.

“Mapang talangka lir külen onok security atema ajurutepogo. Chief minister tem nungi telungpur khuret koktettsü atema tebilemba aika nguogo” ta paisa CM den senden aliba indang olen ka ashi.

North East state kar tsüngda arrtsü mangatettep aliba atema Rajnath Singh-isa ashiba agi iba atema Supreme Court nung angadangtsü lir anungji Centre-i state tem dang ekcha meinyak atatsü mepishir.

Northeast aser talisa Assam nung Islamic kiralongraba maparen tuluba akümba atema asüngdangdang Home minister-i ashiba agi, “Iba khuret atema Centre aser state külem ser inyaktsüla. Iba ya state atema dang masü saka linük atema khuret lir. Onoki iba mapa anendaktsütsü atema tajungtiba agi inyaker.”