National Spell Bee Competition nung Nagaland nungi shilem agi

Dimapur, January 05 (TYO): Wiz National Spell Bee Nagaland-i 26 & 27, December, 2017 anogotem nung Kolkatta nung aliba South City International School nung Wiz National Spell Bee competition 8buba Mega Grand Finale nung shilem agiogo, ta tanü Wiz National Spell Bee Nagaland Coordinator, Meyirenla Yaden-i sangdong ka ajanga metetdaktsü.
Tang agi tanabenbuba Nagaland nungi kaketshirtemi iba sentong nung shilem agi, aser taküm shilem agir timba liasü iba den külemi taoba mapang dang nungi Wiz Spell Bee Nagaland-i tang tajungba shilem agiogo, ta kasa sangdong ajanga metetdaktsü.
Taoba mapang shilem agir teneti final nung shilem agiba den medemdangra, tanbo Nagaland nungi kaketshir 78-i kanga tejangraba tulu nung shilem agia liasü.
National sabang nung kaketshir aika nem maongka agütsütsü nükjidong nung iba ya inyak. India tesem balala nungi tajungpurtem dang shimtet, anungji shilem agir ajaki trophies aser certificates nguogo.
Final tetoktepba nung kaketshir ajak agi parnok 964-i shilem agia liasü.
Nagaland nungi kaketshir asembo top 20 nung aden aser parnokji- St. Paul Higher Secondary School Dimapur nungi Kr. Linovini Zhimomi (Category 6) nung jenjang 8buba liasü aser lai trophy aser certificate den senpet angu; Holy Child School Dimapur nungi Kr. Nzani M Lapon-i (Category 6) nungi jenjang 12buba angu aser Hope Academy Dimapur nungi Saanvi Jain-i (Category 1) nungi jenjang 20buba ngua liasü.
Talisa Nagaland nungi kaketshir 5 top 30 nung aden, kaketshir 14 top 40 nung, kaketshir 27 top 50 nung, kaketshir 26 top 60 nung aser kaketshir 3 top 70 nung densema liasü.
“Onoki shilem agir kaketshir ajaki meranga shilem agiba aser takok anguba atema tenüngsang agütsür. Onokisa parnok tsüraburtemi timtem arema onok meina aruba atema parnok danga pelaba lemsateper,” ta kasa sangdong ajanga metetdaktsü.
Ano National jenjang nung tokteptsüsa kaketshirtem nem training agütsür Renbenmo Tungeo aser Lipi na danga pelar, ta laisa metetdaktsü.