Native Shuttlers-i Mkg Inter-Club Badminton champion benogo

Mokokchung, Sept 30 (TYO): Sept 28 nungi 30 tashi Mokokchung Badminton stadium nung Mokokchung Inter-Club Badminton Champion 2017 asayaa arur Honibarnü tembangogo aser taküm iba championship marok Mopungchuket nungi Native Shuttlers ‘B’-i benogo.
Final asaya Native Shuttlers B aser Team Bendangsünep na asayaba match tenet (7) asayaba nung Native-i pezü (4) akok aser Team bendangsünep-i match asem akok. Asaya telemsa 7 rongnung Native Shuttlers B-i Mixed Doubles, 45+ category, Under 15 girls, 35+ -nung akok aser Team Bendangsünep-i under 17 boys, Under 13 boys, Men’s doubles-tem nung akok.
Mezüng takok angur nem tanga senpet densema sen 50,000/- aser tanabuba jenjang atonger nem tanga senpet dena sen 30,000/- agütsüogo. Iba den ano tayongertemi Most Promising Player (tetsür) Longsa Sporting Club nungi Imsüsenla (u-13) aser Most Promising Player (tebur) Native Shuttelers ‘B’ nungi Sentisang (u-13) na shimteta tena nema senpet agütsü.
Taküm iba asayamung nung club 8 nungi telok 10-i shilem agia liasü. Iba asayamung shibangba sentong nung Mokokchung ADC & MMC Administrator Manpai Phom tongti tesemdanger liasü.
Iba asayamung ya Mokokchung District Badminton Association (MDBA)-i badminton asaya ajungkettsüba den lanur sempet aketertem ajungshia sabang lapoktsütsü nükla nung taküm agi joko kümnabuba ayongzüka kaogo.